Azərbaycan, Bakı, 28 may /Trend, müxbir E.Əliyev/
2013-ci ilin aprel ayında Bakıda təkrar mənzil bazarında qiymətlər əvvəlki ayla müqayisədə 0,7 faiz artaraq bir kvadratmetr üçün 1211 dollar təşkil edib. Trend-in məlumatına görə, bu barədə "Əmlak Bazarı İştirakçıları" İctimai Birliyinin yaydığı məlumatda deyilir.
Aprel ayında təkrar mənzil bazarında təklif 3,7 faizə qədər azalıb. Satışa çıxarılan mənzillərin sayı 5400-ə düşüb.
Bazarda təklif portfelində Yasamal, Nəsimi, Nərimanov və Xətai rayonlarının payı 78,7 faiz təşkil edib. Portfelin uzun müddət ərzində bu dörd rayonun hesabına formalaşması həmin rayonlardakı yeni tikililərin bazara çıxarılması ilə əlaqədardır.
Araşdırmalar göstərir ki, ilkin mənzil bazarında da portfel, əsasən, bu dörd rayonun hesabına formalaşır.
Bazara orta qiymətdən aşağı təklif olunan təkrar mənzillərin payı 53,1 faiz təşkil edib. Apreldə təkrar bazarda təklif olunan orta otaq göstəricisi 2,79, hər otağın orta qiyməti - 46 472 dollar, mənzillərin qiyməti isə 113 162 dollar təşkil edib.
