Azərbaycan, Bakı, 6 mart /Trend/
"Mitsubishi"-nin Azərbaycan üzrə satışları 2013-cü ildə 26% artıb. Trend-in məlumatına görə, bunu brendin müstəsna idxalçısı və distribüteri olan "Diamond Motors" şirkətinin direktoru Zakir Kərimzadə bildirib.
"Mitsubishi Motors"-un Avropa, Yaxın Şərq və Afrika üzrə korporativ baş direktoru Tatsuya Kaji ilə "Diamond Motors" rəhbərinin imzaladığı müqavilə "Diamond Motors"-a növbəti illərdə də brendi təmsil etmək imkanı verib.
Azərbaycanda xüsusilə Pajero, ASX və L200 kimi modelləri bestsellerə çevrilmiş Mitsubishi-nin yenilikləri də avtomobil həvəskarları arasında maraqla qarşılanır. 2013-cü ildə bazara təqdim edilmiş tam yeni Outlander qısa bir zamanda müştərilərin rəğbətini qazanıb.
"Diamond Motors" şirkəti "Mitsubishi"-nin 2006-cı ildən bəri Azərbaycanda dileridir. 2013-cü ildən isə brendin müstəsna idxalçısı və distribüterinə çevrilib. Bakıda 3 "Mitsubishi" salonundan əlavə, "Diamond Motors" ötən il Lənkəran və Gəncədə də "Mitsubishi" salonları açaraq, müştərilərə regionlarda daha yüksək xidmət göstərilməsini təmin edib.
"Mitsubishi"-nin müstəsna idxalçısı və distribüteri olmaq bizə müştərilərimizə daha yüksək xidmət göstərmək imkanı verməklə yanaşı, həm də bu məşhur brend qarşısında daha məsuliyyətli edir" - Diamond Motors-un direktoru belə deyib.
Qeyd edək ki, "Mitsubishi"-nin müstəsna idxalçısı və distribüteri olmaqla, "Diamond Motors" avtomobillərə 3 il və ya 100000 km zəmanət verməklə yanaşı, təqdim etdiyi ehtiyat hissələri və servisə də 2 il zəmanət verir.
