Azərbaycan, Bakı, 3 aprel /Trend, müxbir E.Əliyev/
Azərbaycanda ilk özəl kredit bürosunun texniki tərəfdaşla müqavilənin bağlanması üzrə danışıqları təxirə salınır. Bu barədə Trend-ə Beynəlxalq Maliyyə Korporasiyasının (IFC) Mərkəzi Asiya və Azərbaycanda maliyyə infrastrukturunun möhkəmləndirilməsi layihəsinin əlaqələndiricisi Teymur Heybətov deyib. Müvafiq müqavilə üzrə danışıqların bu ilin birinci rübündə başlanması planlaşdırılmışdı.
T.Heybətov qeyd edib ki, yubanma büronun yaradılması üzrə İcraiyyə Komitəsinə tenderdə qalib gələn iki namizəd tərəfindən verilən təkliflərin müzakirəsi üçün daha çox vaxtın tələb olunması ilə bağlıdır.
CRIF (İtaliya) və "Creditinfo" (İslandiya) şirkətləri İcraiyyə Komitəsinin elan etdikləri müvafiq tenderin qalibləri olublar. İddiaçılar öz təkliflərinin həm texniki, həm də maliyyə hissələrini təqdim ediblər.
Onun sözlərinə görə, danışıqların başlayacağı tarix büronun fəaliyyəti üçün müvafiq qanunvericilik bazasının formalaşdırılmasındakı irəliləyişdən də asılı olacaq: "Biz ümid edirik ki, yaxın vaxtlarda "Özəl kredit büroları haqqında" qanun layihəsi qurumlararası müzakirələrə göndəriləcək və məhz bundan sonra danışıqlara başlamaq olar".