Azərbaycan, Bakı, 1 may /Trend, müxbir E.Əliyev/
Azərbaycanda ilk özəl kredit bürosunun fəaliyyəti üçün qanunvericilik bazası ilin sonunadək yaradılacaq. Bu barədə cümə axşamı Trend-ə Beynəlxalq Maliyyə Korporasiyasının (IFC) Mərkəzi Asiyada və Azərbaycanda maliyyə infrastrukturlarının möhkləmləndirilməsi layihəsinin əlaqələndiricisi Teymur Heybətov bildirib.
T.Heybətov deyib: "Biz ümid edirik ki, müvafiq prosedurlar ilin sonunadək başa çatacaq".
Onun sözlərinə görə, özəl kredit bürosunun yaradılması işi iki istiqamətdə aparılır: büronun fəaliyyətini tənzimləyəcək qanunvericilik bazasının yaradılması, eləcə də özəl sektorla əməkdaşlıq və sərmayəçilərin cəlb edilməsi: "Qanunvericiliyə gəldikdə, özəl kredit büroları haqqında qanun layihəsi aprelin 8-də fərdi məlumatlar, banklar, bank olmayan kredit təşkilatları haqqında qanuna və İnzibati Xətalar Məcəlləsinə dəyişikliklər paketi şəklində ölkənin Mərkəzi Bankına göndərilib. Mövcud qaydalara uyğun olaraq, həmin sənədlərə 60 gün ərzində baxılacaq".
Onun sözlərinə görə, formatın sərbəst qanundan düzəlişlər paketinə dəyişdirilməsi haqqında qərar ölkədə ilk özəl kredit bürosunun fəaliyyəti üçün belə qanunverici bazanın daha sürətlə formalaşdırılacağı ilə bağlıdır: "Bundan başqa, bu, Avropa praktikasıdır, orada özəl kredit bürolarının fəaliyyəti haqqında ayrıca qanun mövcud deyil".
