Azərbaycan, Bakı, 2 may /Trend, müxbir E.Əliyev/
Beynəlxaql Maliyyə Korporasiyası (IFC) Azərbaycanda qiymətləndirmə fəaliyyətinin lisenziyalaşdırılmasının əleyhinədir. Bu barədə cümə günü Trend-ə Beynəlxalq Maliyyə Korporasiyasının Mərkəzi Asiya və Azərbaycanda "Maliyyə infrastrukturunun təkmilləşdirilməsi" layihəsinin koordinatoru Teymur Heybətov deyib.
T.Heybətov bildirib: "Biz lisenziyalaşdırmanın tərəfdarı deyilik, çünki bu, bürokratiyaya gətirib çıxaracaq və lisenziyaların verilməsi prosesi çox çətin olacaq. Biz qiymətləndirmə fəaliyyətinin özünü tənzimləməsinin tərəfdarıyıq. Bu, qiymətləndiricilərin mütəxəssisləri sertifikatlaşdıracaq hansısa assosiasiyasının yaradılmasını nəzərdə tutur və indiki halda assosiasiyanın özü keyfiyyət zəmanəti kimi çıxış edəcək".
Onun sözlərinə görə, belə təcrübə artıq ölkədə tətbiq olunub, lakin yalnız daşınmaz əmlakı əhatə edir: "Ölkədə Qiymətləndiricilər Cəmiyyəti daşınmaz əmlakın, nadir hallarda kredit üçün girov kimi çıxış edən avtomobillərin qiymətləndirilməsi üzrə mütəxəssislərin hazırlanmasını həyata keçirir. Azərbaycanda geniş mənada daşınan əmlak qiymətləndiricilərinin treninqləri və sertifikatlaşdırılması prosesi hazırda aparılmır".
