Azərbaycan, Bakı, 10 may /Trend, müxbir E.Mehdiyev/
Azərbaycanda çox yüksək makroiqtisadi sabitlik müşahidə olunur. Trend-in məlumatına görə, bunu Mərkəzi Bankın sədri Elman Rüstəmov jurnalistlərə açıqlamasında bildirib.
E.Rüstəmov qeyd edib ki, inflyasiya ölkədə ən aşağı səviyyədədir: "Birinci rübün yekunlarına görə, biz 2 faizlik inflyasiyaya nail ola bilmişik. Təbii ki, biz ölkədə faiz dərəcələrinin aşağı salınması siyasətini də həyata keçiririk".
Mərkəzi Bank sədrinin sözlərinə görə, Azərbaycanda ilin sonuna kimi davamlı makroiqtisadi sabitlik və aşağı inflyasiya proqnozlaşdırılır: "Kreditlər üzrə faiz dərəcələri aşağı salınmalıdır. Faiz dərəcələri elə səviyyəyə salınmalıdır ki, həm əhali, həm də biznes üçün səmərəli olsun".