...

Azərbaycanda ilk özəl kredit bürosunun potensial təsisçilərinin siyahısı genişlənib

Biznes və iqtisadiyyat xəbərləri Materials 31 İyul 2014 19:36

Trend-i buradan izləyin

Azərbaycan, Bakı, 31 iyul /Trend, müxbir İlahə Məmmədli/

Azərbaycanda ilk özəl kredit bürosunun potensial təsisçilərinin siyahısı 13-dək artıb. Bunu Trend-ə Beynəlxalq Maliyyə Korporasiyasının (IFC) Mərkəzi Asiya və Azərbaycanda "Maliyyə infrastrukturunun möhkəmləndirilməsi" layihəsinin (ACAFI) əlaqələndiricisi Teymur Heybətov deyib.

Onun sözlərinə görə, büronun yaradılmasına dair icraiyyə komitəsinə 2 bank olmayan kredit təşkilatı - "Finca Azerbaijan" və "AzeriKredit" qoşulub.

Onların qoşulmasınadək potensial təsisçi qismində 11 bank - "Access Bank", "AGBank", "Azərbaycan Sənaye Bankı", "Bank Respublika", "DəmirBank", "Muğanbank", "PAŞA Bank", "Turan Bank", "Yapı Kredit Bank Azerbaijan", "Unibank" və "Kapital Bank" iştirak edib.

T. Heybətov digər kommersiya banklarının da təşəbbüsə qoşulması ehtimalını istisna etmir: "Bu o deməkdir ki, ölkənin maliyyə sektoru layihəyə kifayət qədər maraq göstərir. İştirakçıların sayı məhdudlaşdırılmayıb. Məlum olduğu kimi, büronun kapitalında iştirak payının yarısını texniki tərəfdaş alacaq və komitə yerli səhmdarların strukturunu xeyli dəyişmək istəməzdi".

Onun sözlərinə görə, büro ilə texniki əməkdaşlıq üzrə xidmətlərin göstərilməsinə namizədlər CRIF (İtaliya) və "Creditinfo" (İslandiya) şirkətləridir: "Onlar tender səviyyəsində seçilib. Namizədlər təkliflərinin texniki və maliyyə tərəflərini təqdim ediblər və onlar öyrənilməsi üçün Azərbaycan Mərkəzi Bankına verilib".

Paralel olaraq Azərbaycanda özəl kredit bürolarının fəaliyyəti üçün qanunvericilik bazası hazırlanır. T. Heybətov deyib ki, hələ aprel ayında Mərkəzi Bank fərdi məlumatlar, banklar, bank olmayan kredit təşkilatları və İnzibati Xətalar Məcəlləsi haqqında qanuna dəyişikliklər paketini hökumətə göndərib: "Qanunvericilik hazırlandıqdan sonra şirkət yaradılacaq və kredit bürosunun fəaliyyətə başlaması üçün digər təşkilati tədbirlər görüləcək".

Məqalədə:
Xəbər lenti

Xəbər lenti