Azərbaycan, Bakı, 3 sentyabr /Trend, müxbir Səbinə Əhmədova/
Almaniya Azərbaycan ilə ticarət dövriyyəsini artırmaq niyyətindədir. Bunu Trend-ə açıqlamasında "Almaniya İqtisadiyyatının Şərq Komitəsi"nin icraçı direktoru Rayner Lintner bildirib.
R.Lintner qeyd edib ki, iki ölkə arasında illik ticarət dövriyyəsi 2,5 milyard avrodan çoxdur: "Amma biz burada da inkişaf görürük. Biz Azərbaycanın iqtisadiyyat və sənaye naziri ilə keçirdiyimiz söhbətdə də bu potensialın tükənmədiyi qərarına gəldik. Ona görə də nəzərdə tutmuşuq ki, gələn il iki ölkənin müəssisələrinin iştirakı ilə biznes forum keçirək. Biz həmin biznes forumda Almaniya şirkətlərinin Azərbaycanda hansı sahələrə sərmayə yatırması imkanları barədə fikir mübadiləsi aparacağıq".
O, hesab edir ki, təkcə neft və qaz sahəsinin inkişafı ön planda dayanmır. "Almaniya İqtisadiyyatının Şərq Komitəsi"nin icraçı direktorunun sözlərinə görə, eyni zamanda, sabit sənaye, texnologiyalar, kənd təsərrüfatı sahəsi, davamlı, sabit ərzaqla təchizat, kommunal və infrastruktur, mənzil təchizatı və enerjiyə qənaət məsələləri hər bir ölkənin inkişafı üçün vacibdir.
Qeyd edək ki, Alman-Azərbaycan Forumunun İdarə Heyətinin sədri, Alman Mərkəzi Sənətkarlar Birliyinin keçmiş baş katibi, sabiq dövlət katibi Hans-Eberhard Şlayerin, Bundestaqın deputatı, Almaniya-Cənubi Qafqaz parlament qrupunun rəhbəri Karin Ştrentsin, "Almaniya-İsrail Cəmiyyəti"nin sədri Raynold Robbenin, Alman-Azərbaycan Forumunun baş katibi, keçmiş dövlət katibi Mixael Andreas Butsun və "Almaniya İqtisadiyyatının Şərq Komitəsi"nin icraçı direktoru Rayner Lintnerin daxil olduğu Almaniya nümayəndə heyəti Azərbaycanda səfərdədir.
Nümayəndə heyəti səfər çərçivəsində bir sıra dövlət qurumları ilə görüşlər keçirib.