Azərbaycan metal konstruksiya ixracına başlayacaq
Azərbaycan, Bakı, 18 sentyabr /Trend, müxbir Hüseyn Vəliyev/
Qaradağ Metal Konstruksiyalar Zavodu qarşıdakı iki ildə Avropa bazarlarına çıxmağı planlaşdırır. Trend-in məlumatına görə, bunu cümə axşamı zavodun Direktorlar Şurasının sədri Rüfət Sucayev İqtisadiyyat və Sənaye Nazirliyinin təşkil etdiyi mətbuat turunda deyib.
Qaradağ rayonunun Sahil qəsəbəsində tikilmiş zavodun açılışı 2012-ci ildə olub. Zavodun ümumi dəyəri 8,6 milyon manatdır.
R.Sucayev qeyd edib: "Biz hazırda xarici bazarlara çıxmaq imkanlarını nəzərdən keçiririk. İlk müqavilə Qazaxıstandan olan sifarişçi ilə imzalanıb və biz artıq metal konstruksiyaların istehsalı üzrə sifarişin yerinə yetirilməsinə başlamışıq. Onların montajı da zavodumuz tərəfindən həyata keçiriləcək".
Zavod Azərbaycanda sənaye müəssisələrinin tikintisi prosesində iştirak etmək niyyətindədir. Zavod hazırda kənd təsərrüfatı, çay fabriki, heyvandarlıq fabriki sahəsində müəssisələrin tikintisi üzrə işlər həyata keçirir.
Onun sözlərinə görə, Qaradağ zavodu, həmçinin gələn il I Avropa Oyunlarının keçiriləcəyi Bakı Olimpiya Stadionunun tikintisi üçün 10 min ton hazır məhsul partiyasını çatdırıb.
Qeyd edək ki, ildə 24 min ton metal konstruksiyanın istehsal olunacağı zavodda 120 nəfər işlə təmin olunub.
