Azərbaycan, Bakı, 9 iyun /Trend, müxbir Azad Həsənli/
Beynəlxalq Valyuta Fondu (BVF) 2015-ci il sentyabr ayında Azərbaycan maliyyə sektorunun ikinci qiymətləndirilməsinin nəticələrini açıqlayacaq.
Trend-in məlumatına əsasən, bu barədə BVF-nin eksperti Ceyms Uolş Bakıda keçirilən mətbuat konfransında çıxışı zamanı deyib.
O bildirib ki, cari ilin mart ayında ölkənin maliyyə sektorunun qiymətləndirilməsi həyata keçirilib: "Hazırda Azərbaycanın Mərkəzi Bankı ilə yekun sənədin mətni razılaşdırılır".
C.Uolş qeyd edib ki, ikinci qiymətləndirmə çərçivəsində məsləhətlər Azərbaycan hökumətinin hazırkı şərtlər daxilində iqtisadiyyatın dollarlaşdırılmasına qarşı həyata keçirilən tədbirlərlə əlaqədardır.