Çin səfiri: Bakı Asiya ilə Avropa arasında iri qovşağa çevrilə bilər

Bakı. Maksim Tsurkov - Trend:

Çin ümid edir ki, Bakı Asiya ilə Avropa arasında iri qovşağa çevriləcək.

Trend-in məlumatına görə, bunu Bakı Beynəlxalq Dəniz Ticarət Limanına təhvil verilmiş texnikanın təqdimat mərasimi zamanı Çinin Azərbaycandakı səfiri Vey Tszinhua deyib.

O qeyd edib ki, iki ölkə rəhbərlərinin müntəzəm səfərləri və çoxsaylı sənədlərin imzalanması Çin və Azərbaycan arasında münasibətlərin inkişafını müəyyənləşdirib:

“Çin Avrasiya nəqliyyat qovşağında Azərbaycanın xüsusi üstünlüklərinə böyük diqqət ayırır. Bu səbəbdən Çin şirkətləri nəqliyyat və logistika sahələrində Azərbaycanla əməkdaşlığı dəstəkləyir. Bu gün Bakı limanına təhvil verilən texnika yüklərin qəbulu üzrə Azərbaycanın potensialını artıracaq və onun regionda ticarət və logistika mərkəzi kimi rolunu daha da gücləndirəcək”.

Səfirin sözlərinə görə, Çin ümid edir ki, Bakı tezliklə iri logistika qovşağı olacaq:

“Böyük İpək yolu iki min il əvvəl xalqlarımızı birləşdirdi. Azərbaycanın müstəqillik əldə etməsindən sonra bizim tarixi əlaqələrimiz bərpa olundu. İndi isə münasibətlər “Bir kəmər, bir yol” təşəbbüsü çərçivəsində möhkəmlənir. Hər iki ölkə bütün məsələlərdə bir-birini dəstəkləyir”.