Çexiya gömrük orqanlarında Kinologiya mərkəzinin yaradılmasında Azərbaycanın təcrübəsindən istifadə edib. Trend bildirir ki, fevralın 3-də Çexiya Respublikası Gömrük administrasiyasının baş direktoru Vendulka Holl bu barədə bəyan edib.
Onun sözlərinə görə, Azərbaycan tərəfindən həmin sahədə əməkdaşlıq təklifi edilib və son illər ərzində Çexiyada regional kinologiya mərkəzi açılıb və orada hər şeydən öncə, itlərə təkcə narkotik vasitələrin yox, həm də müxtəlif partladıcı maddələrin axtarışı üçün də təlimlər keçilir.
"Bu mərkəzin yaradılmasında uğurlu təcrübələrdən biri kimi biz Azərbaycanın təcrübəsindən istifadə etmişik" -deyə o bildirib.
Bundan başqa, V.Holl qeyri-qanuni daşımaların, xüsusilə narkotik vasitələrin aşkar edilməsi səmərəliliyinin artırılması üçün dünyanın bütün ölkələrində belə müəssisələrin yaradılması və inkişafı zərurətini qeyd edib.
Çexiya gömrük təşkilatının nümayəndəsi qeyd edib ki, ölkənin gömrük orqanı həmin sahədə dünyanın müxtəlif ölkələri ilə əməkdaşlığı genişləndirməyə hazırdır.