Vergilər nazirliyi maliyyə Nazirliyinin Vergi Məcəlləsinə əlavə və dəyişikliklərin edilməsi layihəsinin büdcə paketindən ayrılmasına dair təşəbbüsünü dəstəkləyir. Trend bildirir ki, vergilər naziri Fazil Məmmədov jurnalistlərlə söhbətində bunun daha sivil yol olduğunu etiraf edib, çünki parlament komissiyalarında müzakirələr zamanı əlavə dəyişikliklərə zərurət yaranır, bu isə bütün büdcə paketinə yenidən baxmaya gətirib çıxarır. "Bütün paketə düzəliş etməkdənsə, öncədən vergi dəyişikliklərinin qəbul edilməsi və bunlar nəzərə alınmaqla dövlət büdcəsinə baxılmaq üçün verilməsi yaxşıdır" -deyə nazir öz qənaətini bildirib. Onun sözlərinə görə, artıq bu istiqamətdə Dövlət xəzinədarlığı və Maliyyə nazirliyi ilə işlərə başlanılıb.
F.Məmmədov hesab edir ki, iyunda Vergi Məcəlləsinə əlavə və dəyişikliklər layihəsi artıq hökumətə təqdim olunacaq.
Xüsusilə mənfəət vergisi ilə bağlı vergi yüklərinin azaldılmasına gəlincə, nazir hər il bu dərəcəyə yenidən baxılmasını məqsədəuyğun hesab etmir. Qeyd edək ki, 2006-cı ildən mənfəət vergisinin dərəcəsi 22% təşkil edir, indiyədək iki il ərzində dərəcə 24% idi. Ötən dəyişiklik 2004-cü ildə baş verib, həmin vaxtadək 25% dərəxə tətbiq olunurdu. Vergilər naziri qeyd edib ki, mənfəət vergisinin dərəcəsinin 20%-dək (5%) azaldılmasını hökumət 5 il ərzində həyata keçirməyə niyyətli idi. Gələn il növbəti azaldılmanın planlaşdırılmadığı nəzərə alınarsa, onda hesab etmək olar ki, 2008-ci ildə bu, planlaşdırılmış məqsədə (20%) çatdırılacaq.
