"Azərşin" SC-nin aksiyalarının satışı ilə bağlı investisiya müsabiqəsinin keçirilməsi müddəti yenidən dəyişdirilib. Trend Dövlət əmlakının idarə edilməsi üzrə Dövlət komitəsinin məlumatına istinadən bildirir ki, müsabiqə təklifləri aprelin 18-də qiymətləndiriləcək. Aprelin 14-dək təkliflər qəbul edilir. Ötən müsabiqə martda keçirilməli idi.
Müsabiqədə iştirak etmək istəyənlər istehsal olunan malların siyahısının genişləndirilməsi, müasir texnologiyaların tətbiqi, iş yerlərinin bərpası və müasir rezin şin standartlarına cavab verən istehsalın təmin edilməsi üçün yeni iş yerlərinin açılması kimi məsələlərin əks olunduğu investisiya proqramları təqdim etməlidir.
Sərmayəçilər həm də dövlət büdcəsinə 800 min AZN. köçürülməsi və 35 min özəlləşdirmə çekinin verilməsinə dair təkliflər təqdim etməlidir. İnvestisiya müsabiqəsində həm yerli, həm də xarici sərmayəçilər iştirak edə bilər. Bununla belə, kimya sənayesi müəssisələrinin istismarı üzrə qabaqcıl təcrübəyə malik olan və səmərəli sərmayə qoyuluşu ilə bağlı öhdəlik götürən, eləcə də maksimum həcmdə investisiya təklif edən sərmayəçiyə üstünlük veriləcək.
