TRACECA nəqliyyat dəhlizi ölkələrinin hökumətlərarası komissiyasının mayın 2-3-də Sofiyada keçiriləcək növbəti 5-ci iclasında Azərbaycan nümayəndə heyətinə nəqliyyat naziri Ziya Məmmədov rəhbərlik edəcək. Bu barədə Trend agentliyinə təşkilatın Azərbaycan üzrə milli katibi Akif Mustafayev xəbər verib.
Qarşıdakı iclas zamanı 2015-ci ilədək nəqliyyat dəhlizinin inkişaf strategiyasının müzakirə və qəbulu gözlənilir. Bundan əlavə, 2007-ci ilə olan büdcə məsələləri və təşkilatda müşahidəçi statusuna da baxılacaq.
A.Mustafayevin dediklərinə görə, iclas zamanı Poti-Bakı-Aktau-Almatı marşrutu ilə işləyən nümayiş konteyner qatarı layihəsini də müzakirə etmək planlaşdırılır.
Hazırda Azərbaycan, Qazaxıstan və Gürcüstan həmin stansiyanın Çin-Qazaxıstan sərhədindəki Dostık stansiyasınadək uzadılması barədə danışıqlar aparır. Mütəxəssislərin fikrincə, bu, yük daşınmalarının həcmini xeyli artırmağa imkan verəcək.
Qarşıdakı iclas çərçivəsində Qars-Axalkalaki-Tbilisi-Bakı dəmir yolunun açılması məsələsi də diqqət mərkəzində olacaq.
