Milli Məclisin iqtisadi siyasət məsələləri daimi komissiyası payız sessiyasının müzakirəsinə təqdim edəcəyi qanun layihələrini avqustun birinci yarısına qədər müəyyənləşdirəcək. Bu barədə Trend ə adıçəkilən komissiyanın üzvü, Sosial Rifah Partiyasının sədri, millət vəkili, professor Xanhüseyn Kazımlı bildirib.
X.Kazımlı bildirib ki, Azərbaycanda iqtisadi sahədə inkişafın səviyyəsi yüksəldikcə iqtisadi qanunvericilik aktlarında da dəyişiklik olunmalıdır. Professor qeyd edib ki, belə dəyişikliklər bütün sahələrdə zəruridir: "1992-ci ildə, eləcə də iki il bundan öncə qəbul edilən bir çox qanunvericilik aktlarında əlavə və dəyişikliklər edilməlidir. Çünki onların çoxu mövcud reallıqlarla uzlaşmır".
Millət vəkili vurğulayıb ki, təmsil olunduğu komissiyada bu sahədə iş aparılır: "Biz iqtisadi qanunvericilik şöbəsi ilə birgə hansı qanunlara əlavə və dəyişikliklərin aparılması barədə iş aparırıq. Çox güman ki, avqustun birinci yarsınadək bu işimizi yükunlaşdırıb, hazırladığımız sənədləri parlamentin payız sessiyasına təqdim edəcəyik".