Avropa Yenidənqurma və İnkişaf Bankı (AYİB) Azərbaycan və Gürcüstan bank sektoruna verilən kreditlərin təhlili üzrə yeni təcrübənin tətbiq edilməsini, risklərin idarə olunma mexanizmini təkmilləşdirməyi və korportiv idarəetmə standartlarının tətbiq edilməsini təklif edir. Trend in verdiyi xəbərə görə, bu barədə AYİB-in Bakı nümayəndəliyinin başçısı Reymond Konvey "Bank və maliyyə" adlı I Beynəlxalq Qafqaz konfransının "Azərbaycan və Gürcüstan iqtisadiyyatının dinamik inkişafında maliyyə sektorunun rolu" mövzusunda birinci sessiya çərçivəsində bildirib.
Onun sözlərinə görə, Azərbaycan bankları tərəfindən verilmiş kreditlərin həcmi ÜDM-də 12%, gürcü banklarının verdiyi kredit isə 15 % təşkil edir. Ümumi kapital ÜDM-də Gürcüstanda 4 % olduğu halda, Azərbaycan banklarında 2-3 %-dir.
O, iki ölkənin bank sistemlərinin aktivlərinin artımı haqqında da danışıb. Azərbaycanda bank aktivlərinin artımı 60-66%, Gürcüstanda isə 70% təşkil edir. Bununla yanaşı, o qeyd edib ki, Azərbaycanda kreditlərin çoxu Bakıda verilir, Gürcüstanda isə regionların payı üstünlük təşkil edir. Bu onunla izah olunur ki, iqtisadiyyatın şah damarı Bakıda yerləşir, ona görə də bank sektoru paytaxtda cəmlənib.
"Banklararası rəqabətin artması səbəbindən, onlar müştərilərin cəlb olunma problemi ilə daha çox qarşılaşırlar, ona görə də regional inkişafa diqqət ayırmaq çox vacib məsələdir", - deyə R.Konvey bildirib.
