Azərbaycanın Milli Bankı baş mühasibat sisteminin dəstəklənməsi üçün şirkətin cəlb olunması üzrə təkliflər sorğusu elan edib. Milli Bankdan Trend ə verilən xəbərə görə, təkliflər sorğusu avqustun 9-da keçiriləcək.
Sorğuda iştirak etmək istəyənlər iştiraka görə 50 manat ödəməlidirlər. Onların təqdim etməli olduqları sənədlər paketində dövlət qeydiyyatını və hüquqi statusu təsdiq edən sənədlərin surətləri, ƏDV qeydiyyatının olub-olmamasını müəyyən etməyə imkan verən sənədlərin surətləri, VÖEN və bank rekvizitləri olmalıdır. Milli Banka həmçinin əsas korporativ müştərilər və fəaliyyət sahəsi üzrə iş təcrübəsi haqqında məlumatlar təqdim olunmalıdır.
Qiymət təkliflərində malların qiyməti nəqliyyat xərcləri, sığorta, vergi və gömrük ödənişləri və digər xərclər də nəzərə alınmaqla, manatla göstərilməlidir.
AMB-də qeyd ediblər ki, əvvəllər baş mühasibat kitabı onun yaradılması layihəsinin icraçısı - "QazProm"un tərkibinə daxil olan Rusiyanın Kovus şirkəti tərəfindən dəstəklənirdi. "Dövlət satınalmaları haqqında" qanuna müvafiq olaraq hər il yeni müqavilə bağlanmalıdır.
