Milli bankın nəzdində fəaliyyət göstərən Azərbaycan İpoteka Fondunda regionlar və Bakı şəhəri üçün sosial ipoteka üzrə güzəştlərin fərqləndirilməsi imkanları nəzərdən keçirilir.
AMB-nin baş direktoru Rüfət Aslanlının Trend ə verdiyi məlumata görə, burada paytaxt və regionlardakı mənzillərin dəyəri arasındakı fərq nəzərdə tutulur. Bununla əlaqədar dövlət büdcəsindən ayrılan ünvanlı yardım hesabına regionda mənzilin tam dəyərini ödəmək, yəni dövlətin hesabına mənzil almaq mümkün olacaq.
"Proqramlarımızda regionların inkişafını dəstəklədiyimizlə əlaqədar, bir tərəfdən bu yaxşıdır. Ancaq bu məsələ hələlik açıq qalır", - deyə R.Aslanlı qeyd edib.
Bu günədək AİF-in səlahiyyətli kredit agentləri fond vasitəsilə ayrılmış ümumi 86 kreditdən ölkə regionları üçün 7 kredit verib. AİF-in icraçı direktoru Faiq Məmmədov fondun 6 ayın yekunları üzrə fəaliyyətinin təqdimatı zamanı bildirib ki, kreditlər Texnikabank, Azərdəmiryolbank, Turanbank və Bank Respublika müştərilərinə verilib.
Qubada bir, Mingəçevir, Sumqayıt və Gəncədə isə 2 kredit verilib. F.Məmmədovun sözlərinə görə, səlahiyyətli kredit təşkilatlarının Əli-Bayramlı, Lənkəran və Naxçıvandakı yerli filiallarına çoxlu sayda müraciətlər edilir. Hazırda Naxçıvan və Lənkəranda ipoteka kreditlərinin verilməsi ilə bağlı ərizələrə baxılır.
