Gələn il Azərbaycan hökuməti Kapital Bank-ın özəlləşdirilməsi prosesinə başlamağı planlaşdırıb. Hökumətdən Trend ə verilən məlumata görə, prezidentin qarşıdakı özələşdirmə ilə bağlı 1 mart 2005-ci il fərmanına uyğun olaraq, bankda dövlətin iştirakını 50%-dək azaltmaq üçün onun nizamnamə kapitalının ikiqat artırılması nəzərdə tutulur.
Kapital Bank-ın özəlləşdirilməsinin iki mərhələdə həyata keçirilməsi planlaşdırılır: 1.Əlavə emissiyalar və dövlət payının 50%-dək azaldılması hesabına. 2. Dövlət paketindən qalmış 50%-in satılması. Bu planlarla əlaqədar 2007-ci ilin dövlət büdcəsində Kapital Bankın kapitalının artırılması məqsədilə vəsait qoyulmayıb.
Kapital Bank-ın idarə heyətinin sədr müavini Yaşar Məmmədovun Trend ə verdiyi məlumata görə, bankın nizamnamə kapitalının ikiqat artırılması elan olunmaqla özəlləşdirmənin ilk mərhələsinin başlandığını demək olar. Bu barədə qərar bankın səhmdarlarının toplantısında qəbul olunacaq.
Prezidentin fərmanına uyğun olaraq, səhmlərin yerləşdirilməsi hərraclar vasitəsilə həyata keçiriləcək. Özəlləşdirməqabağı hazırlıq çərçivəsində ötən il Kapital Bank əsas vəsaitlərini təkrar qiymətləndirib. Bunun nəticələrinə görə, 1,5 il ərzində bankın dəyəri 6 dəfə bahalaşıb.
Kapital Bank-da dövlət paketinin satışı hissə-hissə həyata keçirilə bilər. Qiymət bankın fəaliyyətinin auditinin keçirilməsi yolu ilə onların hər birinin gerçəkləşdirilməsi zamanı müəyyən olunacaq. PriceWaterhouseCoopers beynəlxalq şirkətinin Moskva qrupu 1 yanvar 2006-cı il üçün bankın kapitalının bazar dəyərini qiymətləndirib (ilin əvvəli üçün təxminən $23 mln, orta hesabla $50 mln).
Bu, özəlləşdirilmənin 2-ci mərhələsində bankın səhmlərinin satışı məqsədilə istiqamət üçün qoyulan qiymətdir. "Müvafiq olaraq, paket təxminən 35 mln dollardan $40 mln dollaradək qiymətə satılacaq", - deyə bankın idarə heyətinin sədri Rauf Rzayev qeyd edib.
Bu gün bankın nizamnamə kapitalı 60 mlrd manat (12 mln AZN) səviyyəsində formalaşıb. 2005-ci ilin yekunları üzrə bankın bölüşdürülməmiş gəliri 5 mln AZN (25 mlrd manat) təşkil edib.