Azərbaycan Milli Bankının məlumatına əsasən, neft sektoru da nəzərə alınmaqla, ölkənin xarici ticarət tərəfdaşlarının valyutalarına nisbətən manatın real effektiv məzənnəsi (REM) ümumi ticarət dövriyyəsində 0,4%, idxalda 0,5% və ixracda 0,2% bahalaşıb. Milli Bankdan Trend ə verilən məlumata görə, 8 ay ərzində REM-ə ticarət dövriyyəsində nominal valyuta kurslarının dəyişməsi 44,1%, qiymətlərin dəyişməsi isə 55,9% (neft sektoru nəzərə alınmaqla) təsir edib.
Tədqiqatlar həmçinin göstərib ki, avqust ayı ərzində xarici ticarətdə (neft sektoru nəzərə alınmaqla) REM-in artmasına 0,2% ABŞ, 0,5% Türkiyə , 0,2% İran, 0,1% Gürcüstan, 0,1% İsrail, 0,7% Ukrayna, 0,1% Yaponiya, azalmasına isə 0,04% Avrozonalar, 1,2% Rusiya, 0,03% İngiltərə və 0,5% Qazaxıstan təsir göstərib.
Avqust ayında REM 2005-ci ilin analoji dövrü ilə müqayisədə ümumi ticarətdə 7,3%, idxalda 6,5% və ixracda 8% artıb.
2005-ci ilin dekabr ayı ilə müqayisədə avqust ayında qeyri-neft sektorunda REM müvafiq olaraq 1,5%, 1,6% və 0,3%, 2005-ci ilin analoji dövrünə müvafiq olaraq isə 8,4%, 8,7% və 4% möhkəmlənib.
2000-ci ilin dekabrı ilə müqayisədə avqust ayında REM-in azalma tempi ümumi ticarət dövriyyəsində (neft sektoru nəzərə alınmaqla) 13,8%, idxalda 14,8%, ixracda isə 13,1% təşkil edib. Neft sektoru nəzərə alınmamaqla REM müvafiq olaraq 9,3%, 8% i 24,9% ucuzlaşıb.
2006-cı ilin yanvar-avqust ayları ərzində manatın ABŞ, Ukrayna, Yaponiya valyutalarına nisbətən real məzənnəsinin möhkəmlənmə tempi manatın nominal məzənnəsinin möhkəmlənmə tempini keçib. Eyni zamanda, manatın İngiltərə və İsrail valyutalarına nisbətən nominal dəyəri ucuzlaşıb, real isə - möhkəmlənib. Bu, Azərbaycanda inflyasiyanın artım templərinin bu ölkələrdəki istehlak qiymətlərinin artımını ötməsi ilə izah olunur. Bu müddət ərzində ABŞ-da inflyasiya 3,1%, Yaponiyada 0,8%, Ukraynada 3,8%, İsraildə isə 1,8% təşkil edib.
Öyrənilən dövr ərzində manatın real dəyəri avroya nisbətən 0,6%, nominal dəyəri isə 4%, Qazaxıstan tengesinə nisbətən real və nominal dəyəri 4,9%, funt\sterlinqə nisbətən müvafiq olaraq 0,6% və 4,3% ucuzlaşıb. Manatın real dəyərinin nominala nisbətən cüzi ucuzlaşması həmin səbəblərlə izah olunur. Rubla nisbətən manatın real məzənnəsi 5,5%, nominal isə 3,7% ucuzlaşıb. Türkiyə, İran və Gürcüstan lirələriinə nisbətən manatın nominal möhkəmlənməsi bu ölkələrdə inflyasiyanın artım templərinin yüksəlməsi ilə izah olunur.
Milli Bankın çıxardığı nəticəyə görə, uzunmüddətli dövr (2000-06-cı illər) ərzində manatın REM-i ucuzlaşıb ki, bu da AR-in əsas ticarət tərəfdaşları ilə xarici ticarət aparması üçün əlverişli şəraitin olduğunu təsdiqləyir. Respublikanın ticarət tərəfdaşı olan ölkələrdə qiymətlər 38,3% səviyyəsində olduğu halda, 2001-06-cı illər ərzində Azərbaycanda inflyasiyanın səviyyəsi 32,8% təşkil edib.