Trend xəbər verir ki, Azərbaycan İqtisadi İnkişaf Nazirliyi (AİİN) və Rusiya İqtisadi İnkişaf və Ticarət Nazirliyi (RİİTN) arasında "Russkiy Alüminiy" ASC-nin Azərbaycanda alüminium zavodunun inşası layihəsini gerçəkləşdirməsi ilə bağlı bütün çatışmazlıqları aradan qaldırmaq üçün birgə səy göstərmək haqqında razılaşma əldə olunub.
""RusAla" tərəfindən əsaslandırılmamış istəklər var. Söhbət güzəştlərdən daha çox, ASC tərəfindən irəli sürülən müəyyən şərtlərdən gedir", - deyə Azərbaycanın iqtisadi inkişaf naziri Heydər Babayev bildirib.
Onun sözlərinə görə, RİİTN başçısı German Qref ilə görüşdə "RusAla" ilə aparılmış danışıqlar və tərəflər arasında hələ ki, razılıq əldə olunmamış müəyyən məqamlar barədə tam məlumat verilib.
Azərbaycanda yeni alüminium zavodunun inşası layihəsinə əsasən, müəssisənin istehsal gücü ildə 300 min ton təşkil edəcək. Zavodun fəaliyyətini təmin etmək, infrastrukturun genişləndirilməsi və elektrik stansiyasının inşası üçün investisiyaların ümumi həcmi $1 mlrd-ı ötəcək.
H. Babayev həmkarı ilə, həmçinin, Azərbaycanda yığma istehsalı ilə məşğul olmaq istəyən "KAMAZ"la aparılmış danışıqlar bağlı fikirlərini bölüşüb. "Göndərilmiş ilkin şərtləri biz nəzərdən keçirdik və G. Qreflə məsləhətləşdik. O hesab edir ki, müəyyən məqamlar "KAMAZ" tərəfindən düzgün qoyulmayıb", - deyə nazir bildirib.
Onun sözlərinə görə, əgər qərar qəbul olunarsa, Azərbaycandakı zavodda istehsalın minimum həcmi ayda 80 avtomobil təşkil edəcək. Əvvəllər ölkə ildə bu qədər maşın alırdı.
