"2007-ci ilin dövlət büdcəsi haqqında" qanun layihəsi Milli Məclisin daimi komissiyalarında müzakirəyə çıxarılıb. Trend xəbər verir ki, adıçəkilən sənəd noyabrın ikinci yarısında Milli Məclisin müzakirəsinə təqdim ediləcək.
Noyabrın 1-də saat 1100-da Milli Məclisin mədəniyyət məsələləri daimi komissiyasının iclasında adıçəkilən qanun layihəsi müzakirə olunacaq. Daha sonra isə sənəd təhsil məsələləri daimi komissiyasında müzakirə olunacaq. "2007-ci ilin dövlət büdcəsi haqqında" qanun layihəsinin parlamentin digər komissiyalarında da müzhakirəsi planlaşdırılıb. Müzakirələr başa çatdıqdan sonra sənəd parlamentin müzakirəsinə təqdim ediləcək.
Qeyd edək ki, prezident İlham Əliyev "2007-ci ilin dövlət bödcəsi" layihəsini təsdiq edərək parlamentə göndərib. 2007-ci ildə dövlət bödcəsinin gəlirləri 5 335 700 min. AZN, xərcləri isə 5 714 700 min. AZN təşkil edəcək. Büdcənin mərkəzləşdirilmiş gəlirləri 5 169 173,9 min AZN, yerli gəlirləri 166 526,1 min AZN, mərkəzləşdirilmiş xərcləri 4 986 594,8 min AZN, yerli xərcləri isə 728 105,2 min AZN məbləğində təsdiq edilib.
Gələn ilin dövlət büdcəsinin xərclərinin 3 548,3 mln. AZN-i cari xərclər, 2 122,4 mln. AZN-ni əsaslı xərclər, 44 mln. AZN-ni isə kreditlər və faizlərə xidmətlə bağlı xərclər təşkil edir.
