1 yanvar 2007-ci ildən Bakı metropolitenində gediş haqqının kartla ödənilməsinə tam keçidlə bağlı planlar təxirə salına bilər. "Azərikard" prosessinq mərkəzinin baş direktoru Elmar Sadıqovun Trend ə verdiyi məlumata görə, təşkilatı məsələlər hələ öz həllini tapmayıb.
"Məsələ burasındadır ki, Bakı metropoliteni rəhbərliyi metroda qeyri-nağd hesablaşmaya keçid prosesini gediş haqqının artması ilə əlaqələndirirdi. Ancaq hökumət bu qərarı dondurub", - deyə E.Sadıqov qeyd edib. Bununla yanaşı, demək olar ki, bütün metro stansiyalarında turniketlər yeniləri ilə əvəz olunur. Əgər əvəllər keçidin yalnız kart vasitəsilə mümkün olduğu avadanlıqlar quraşdırılırdısa, indi həm jeton, həm də kart vasitəsilə buraxılışın olduğu turniketlər quraşdırılır.
Bakı metropoliteni özünün normal maliyyə-təsərrüfat fəaliyyətini qurmaq və cari probelmlərin həlli məqsədilə metroda sərnişin daşıma xidmətləri tariflərinin dəyişdirilməsi təklifi ilə Tarif Şurasına müraciət edib. Nəqliyyatın bu növünün çoxlu xərc tələb etməsi ilə əlaqədar və onun dövlət tərəfindən subsidiyalaşdırılması nəzərə alınaraq, daşımaların maya dəyərinə təsir edən amil və xərclərin əsaslılığının təhlili və araşdırılması tövsiyə olunub. Tarif Şurası bu məsələyə gələn il qayıtmağı planlaşdırır.