Azərbaycan höküməti ikinci magistral yolu üçün 200 mln. ABŞ dolları məbləğində kreditdən Kürdəmir-Ucar avtomobil yolunun yenidənqurulması layihəsinin maliyyələşdirilməsinə Dünya bankından şifahi razılığın alınacağını gözləyir. Bu barədə Trend ə Azərbaycan Nazirlər Kabinetinin Texniki yardım və qrant şöbəsinin rəhbəri və dövlət zəmanəti altında kreditlər üzrə koordinator Nail Fətəliyev bildirib.
"Dünya bankında Cənubi Qafqaz ölkələri üzrə regional direktor Donna Douset-Koyrolo öz razılığını bildirib və biz rəsmi olaraq banka sorğu göndərdik. Hökümət təxminən 70 mln. ABŞ dolları istəyib", - deyə N.Fətəliyev qeyd edib.
Bu vəsaitlər hesabına layihənin bütün dəyərinin maliyyələşdirilməsi nəzərdə tutulub. Maliyyələşdirmənin artıq ayrılmış kreditdən veriləcəyini nəzərə alaraq, yeni kredit sazişinin imzalanması nəzərdə tutulmayıb.
"Bilavasitə məsləhətçi tuta, tikinti işlərinin keçirilməsi üçün tender elan edə bilərik, bu isə layihənin reallaşdırılmasını sürətləndirməyə imkan verəcək", - deyə N.Fətəliyev qeyd edib.
200 mln. ABŞ dolları həcmində kredit Ələt-Masallı avtomobil magistralı marşrutunun genişləndirilməsi və dəyişdirilməsi, eləcə də Bakını respublikanın qərb rayonları ilə birləşdirən Bakı-Şamaxı-Muğan yolunun təmiri üçün nəzərdə tutulub. Lakin layihə tam hazır olmadığından kredit vəsaitləri sərbəst qalır.
Kürdəmir -Ucar avtomobil yolunun uzunluğu 46,2 km təşkil edir. Əvvəl layihə 18,3 mln. ABŞ dolları həcmində qiymətləndirilirdi, lakin tikinti materiallarının qiyməti qalxdığından o bahalaşıb.
Kürdəmir-Ucar yolu 1999-cu ildə fondun qrant vəsaitləri hesabına hazırlanmış TİƏ -yə əsasən ikizolaqlı olacaq.