Yaponiya Beynəlxalq Əməkdaşlıq Bankının (JBIC) texniki yardımı çərçivəsində Bakıdan Gürcüstana qədər Bakı-Böyük Kəsik dəmir yolunun infrastrukturunun təkmilləşdirilməsinin layihələndirilməsi üçün məsləhətçi təyin edilib. Nəqliyyat nazirinin müavini Musa Pənahovun Trend ə verdiyi məlumata görə, Yaponiyanın Itochu Corporation şirkəti infrastrukturun inkişaf layihəsinin hazırlanmasına cəlb edilib.
Bu günlərdə Nəqliyyyat Nazirliyində Itochu şirkətinin nümayəndələri ilə görüş keçirilib və şirkət artıq işin icrasına başlayıb.
Bu layihə çərçivəsində sürət qatarının yaradılması nəzərdə tutulur. Hökumət layihənin maliyyə mənbəyi ilə bağlı məsələni hələ aydınlaşdırmayıb. Lakin artıq yaponlar, koreyalılar, fransızlar maraqlı olduqlarını bildiriblər.
TİƏ layihəsinin hazırlığı Yaponiyanın ayırdığı qrant hesabına həyata keçirilir. M.Pənahovun sözlərinə görə, Nəqliyyat Nazirliyi texniki yardımın dəqiq məbləği barədə rəsmi məlumat istəyib və bu, təxminən 250-280 min dollar təşkil edir.