Rusiyada Azərbaycan vətəndaşlarının əmək fəaliyyətinin leqallaşdırılması ilə bağlı problemlərin həlli üçün mərkəzi qərargahlar yaradılıb

Azərbaycan və Rusiya arasında əmək miqrasiyası prosesinin operativ şəkildə nizamlanması üçün Azərbaycan vətəndaşlarının RF ərazisində əmək fəaliyyətinin leqallaşdırılmasında onlara yardımın göstərilməsi məqsədilə qarşılıqlı əlaqə üzrə tədbirlər planının hazırlığı başa çatıb.

Azərbaycan Əmək və Əhalinin Sosial Müdafiəsi Nazirliyinin Məşğulluq siyasəti idarəsinin rəisi Vahab Məmmədovun Trend ə verdiyi xəbərə görə, hazırda bu sənədin hüquqi statusu müəyyənləşdirilir və sonra isə həmin sənəd imzalanacaq.

"Biz Rusiya tərəfi ilə bu məsələni bürokratiyasız və operativ şəkildə həll etmək qərarına gəldik. Həm də artıq 1 yanvar 2007-ci il tarixindən RF - nin "Miqrasiya uçotu haqqında" yeni qanunu qüvvəyə minib", - deyə o bildirib.

RF-nin yeni qanunlarına görə, Rusiyaya səfər zamanı miqrasiya xəritəsində mütləq səfərin məqsədini göstərmək lazımdır. Əgər orada səfərin məqsədinin işlə bağlı olduğu göstərilsə, 1 yanvar 2007-ci il tarixindən həmin vətəndaşların işə düzəlməklə bağlı problemləri yaranacaq və heç bir hüquqi məsələlər onlara yardım etməyəcək.

V.Məmmədovun sözlərinə görə, Rusiyanın 7 bölgəsində RF-də azərbaycanlı miqrantların hüquqlarının dəstəklənməsi və onların əmək miqrasiyası ilə bağlı problemləri operativ şəkildə həll etmək üçün Ümumrusiya azərbaycanlıları konqresinin bazasında mərkəzi qərargahlar yaradılıb. Bu qərargahlar RF-nin bütün bölgələrini əhatə edəcəklər.

Azərbaycanın Əmək Nazirliyi, öz növbəsində, həmçinin miqrant vətəndaşların gələcəkdə belə problemlərlə üzləşməməsi və əmək fəaliyyətinin leqallaşdırılması üzrə tam məlumata malik olmaları üçün onlara yaddaş kitabçası hazırlayıb.

Orada həmçinin hüquqi məlumat var, çünki vətəndaşların məhz hüquqi normaları bilməməsi səbəbindən bütün problemlər yaranır.

Əmək Nazirliyi nümayəndəsinin sözlərinə görə, Azərbaycanın nümayəndə heyəti soydaşlarımızın əmək fəaliyyətinin leqallaşdırılması məsələlərinin müzakirə edilməsi çərçivəsində dəfələrlə Rusiyada olub. RF Səhiyyə və Sosial İnkişaf Nazirliyi və Federal miqrasiya xidməti dəfələrlə Rusiyada Azərbaycan vətəndaşlarının əməyinin leqallaşdırılması üçün maksimal şəkildə yardım göstərmək istədiklərini qeyd ediblər.

2007-ci ildə Rusiya höküməti RF-nin əmək bazarlarına çıxmaq üçün kvota müəyyən edib. Vizasız rejimə malik ölkələr üçün kvota 6 milyon, viza rejiminə malik ölkələr üçün isə - 302 mindir.