Azərbaycanın Nazirlər Kabineti "Ölkə ərazisində ümumrespublika və yerli təyinatlı yolların saxlanması və istismara verilməsi üçün "Avtomobil yolları" məqsədli büdcə fondunun vəsaitlərinin sərf olunması qaydaları"nı təsdiq edib. Trend xəbər verir ki, bu barədə Nazirlər Kabinetinin məlumatında qeyd olunub.
Qaydalara əsasən fondun vəsaitləri Bakını ölkənin başqa şəhərləri, rayon mərkəzləri, şəhər tipli qəsəbələr, hava, dəniz və çay limanları, dəmir yolu stansiyaları, qoruqlar və istirahət zonaları, o cümlədən xüsusi obyekt və müəssisələrlə birləşdirən respublika təyinatlı yolların saxlanması və istismara verilməsinə sərf olunacaq.
Vəsaitlər Azərbaycan Nəqliyyat Nazirliyinin təsdiq etdiyi və respublikanın Maliyyə Nazirliyi ilə razılaşdırılan xərclər smetasına uyğun xərclənəcək. Vəsaitlərin sərəncamçısı qismində Nəqliyyat Nazirliyi çıxış edir. Fondun vəsaitləri fonda faktiki daxilolmalar çərçivəsində sərf olunur.
Nəqliyyat Nazirliyi vəsaitlərin sərf olunması haqqında Maliyyə Nazirliyinə rüblük və illik hesabatlar təqdim etməlidir.
Bu fondun formalaşması büdcənin növbəti mənbələri hesabına həyata keçiriləcək: yol vergisi, yük və sərnişin daşınması üçün istifadə olunan avtonəqliyyat vasitələrinin sahibləri və istifadəçilərinin ödədiyi sadələşdirilmiş vergi, idxal olunan avtomobillər üçün tətbiq olunan aksizlər, idxal olunan avtomobillər üçün tətbiq olunan vergi rüsumları, Azərbaycan ərazisindən keçməklə beynəlxalq daşınmaların həyata keçirilməsi üçün icazələrdən dövlət rüsumları, avtonəqliyyatın, o cümlədən motonəqliyyat vasitələrinin, qoşqu və yarımqoşquların illik texniki müayinəsindən dövlət rüsumları.
