Baku Steel Company (BSC) 2007-ci ilin martına qədər məhsul istehsalına başlamağa ümid edir. Bu barədə Trend ə şirkətin mətbuat xidmətindən bildirilib.
"Bu gün metal xammalının alınması davam etdirilir. Lakin istehsalın bərpa olunması üçün ehtiyat hələ kifayət qədər deyil", deyə şirkətdə qeyd olunub.
BSC istehsalatda istifadə olunan metal xammalı ehtiyatının tükənməsi səbəbindən yanvar ayında fəaliyyətini dayandırıb. Şirkət üçün xammala olan gündəlik ehtiyat 1 min ton təşkil edir.
BSC-də fevral ayı ərzində şirkət üçün istehsalın bərpa edilməsinin vacibliyi vurğulanıb.
"Bu gün şirkətin 2 min əməkdaşının hamısı məzuniyyətə göndərilib. Məzuniyyətin müddəti fevral ayının ilk yarısında bitir. Vəziyyətin ağırlaşmasından qaçmaq üçün biz vəziyyətdən çıxış yollarını tapmaq üçün bütün gücümüzdən istifadə etmək niyyətindəyik", deyə mətbuat xidmətində vurğulanıb.
Xammalın xaricdən alınması məsələsinə gəlincə, şirkət bunun arzuolunmaz və effektli olmadığını hesab edir. Belə ki, bu halda şirkətin məhsullarının qiyməti çox yüksək olacaq və bu da alıcılıq qabiliyyətinə mənfi təsir göstərə bilər. Bu günlərdə şirkət yanacağın qiymətinin artması ilə bağlı olaraq metal xammalın alınması qiymətini artırıb. Bu xammalın alınması prosesini stimullaşdırmaq məqsədi güdür. Əgər əvvəllər xammalın keyfiyyətindən asılı olaraq şirkət 1 ton metala - 80-100 dollar ödəyirdisə, indi bu rəqəm ƏDV-siz 115 dollar təşkil edir.
