Azərbaycan,Bakı/müxbir Trend S.Əliyev/Dünya Bankı (DB) Azərbaycan Dövlət Dəmir Yolunun (ADDY) yenidən qurulması və bərpası üzrə layihə hazırlayıb. Bu barədə ADDY-in rəhbəri Arif Əsgərov məlumat verib. 2007-2011-ci illərdə həyata keçirilməsi nəzərdə tutulan bu layihə 630 milyon dollar məbləğində qiymətləndirilir, deyə A.Əsgərov qeyd edib.
Bu layihə çərçivəsində dəmir yolunun lokomotiv və vaqon parklarının yenidən qurulması, energetika təsərrüfatının yaxşılaşdırılması, yol təsərrüfatının yenidən qurulması və digər infrastrukturların bərpası üzrə işlər nəzərdə tutulub.
Bundan başqa, 502 km uzunluqda Bakı-Böyük Kəsik (Gürcüstan sərhədi) marşrutu üzrə sürətli sərnişin qatarının buraxılması layihəsinin reallaşdırılması da nəzərdə tutulub. Bu layihənin reallaşdırılması üçün yolların, energetika təsərrüfatının, siqnalizasiya və rabitənin yenidən qurulması tələb olunur. Bundan başqa, sürətli lokomotiv və vaqonların əldə olunması məsələsi də var. Bu layihədə iştirak etməkdə Yaponiya, Koreya və Fransanın nəqliyyat strukturları maraqlıdır.
