Azərbaycan, Bakı/ Trend müxbir İ.Xəlilova/ Azərbaycan və Belarus hökumətləri əmtəə dövriyyəsinin 500 mln. dollara çatdırılmasını öhdələrinə götürüb. Cümə axşamı verilən məlumata görə, Belarus hökumətinin nümayəndə heyəti ilə Azərbaycanın iqtisadi inkişaf naziri Heydər Babayevin görüşündə bu həcmə nail olmaq üçün yeni əməkdaşlıq formasına keçidin və biznes qurumları arasında münasibətlər qurmağın vacibliyi bildirilib.
Nazir qeyd edib ki, bunun üçün payız aylarında Belarusda Azərbaycan malları sərgisinin təşkil olunması planlaşdırılır. Babayev bu gün nazirlikdə sərgidə malları nümayiş olunacaq "Teksun" şirkətinin rəhbərliyi ilə görüş keçiriləcəyini söyləyib.
"Bizim ölkəmiz Azərbaycanla əməkdaşlığı inkişaf etdirməyə hazırdır. Mayın 2-də Bakıda açılmış Belarus mallarının milli sərgisi də bunu sübut edir. Bizim bütün məhsullarımız dünya keyfiyyət standartlarına cavab veririr və Avropa mallarından geri qalmır. Biz həmçinin tədarükün vahid kanal sistemi ilə aparılmasını təklif edirik" - deyə Belarusun ticarət naziri Aleksandr İvankov bildirib. Onun sözlərinə görə Belarus Azərbaycandan konyak spirti və şərabçılıq malları tədarük etməkdə maraqlıdır. Bu gün həmçinin Belarus tütün kombinatı üçün tütün də tədarük olunur.
Ötən ilin yekunlarına əsasən, ölkələrarası əmtəə dövriyyəsi 36 mln. dollar təşkil edib. Azərbaycandan Belarusa 1,5 mln. dollar dəyərində mal ixrac olunub, Belarusdan idxal isə 34,5 mln. dollar təşkil edir.
