Azərbaycan, Bakı /müxbir Trend İ.Xəlilova / Azərbaycan hökuməti iyunda Cenevrədə Azərbaycan Respublikasının Ümumdünya Ticarət Təşkilatına (ÜTT) qəbul olunması ilə bağlı ABŞ, Yaponiya, Cənubi Koreya ilə ikitərəfli görüşlər keçirməyi planlaşdırır. Bu barədə çərşənbə günü danışıqlar qrupunun rəhbəri, xarici işlər nazirinin müavini Mahmud Məmmədquliyev məlumat verib.
"Bu danışıqlar İşçi Qrupun iyunun 22-də keçirilməsi nəzərdə tutulan növbəti görüşündən əvvəl və ya sonra baş tuta bilər" - deyə Məmmədquliyev bildirib.
Onun sözlərinə görə, Türkiyə ilə danışıqlar apreldə Bakıda keçirilib. "Gələcəkdə ikitərəfli protokolun imzalanması gözlənilir, lakin ən əsası bizim təkliflərimizin qəbul olunmasına razılıqdır" - deyə nazir müavini hesab edir.
Onun fikrincə, Avropa Birliyi və ABŞ ÜTT-yə qəbul olunmaq üzrə əsas tərəfdaşlardır, buna görə də onlarla razılığın əldə olunmasından çox şey asılıdır.
ABŞ və Kanadanı lisenziyalaşdırma, tarif siyasəti, gömrük qanunvericiliyi, intellektual mülkiyyət hüququ ilə bağlı məsələlər maraqlandırır.
ÜTT-nin üzv ölkələri Azərbaycanda tarif siyasətinin nə qədər liberal və şəffaf olmasını araşdırmağı arzu edir. ÜTT-nin tələblərinə əsasən, idxal olunan, həmçinin yerli məhsul və xidmətlər üçün vahid rejim tətbiq olunmalıdır.
AB və ABŞ-ın mövqeləri ÜTT-yə daxil olan ölkənin gömrük tarifləri üzrə öhdəlikləri maksimum öz üzərinə götürməsinə istiqamətlənib.
Bu gün üçün artıq Oman, Gürcüstan və Moldova ilə danışıqlar yekunlaşıb. Bu ölkələrin razılığı var, onlar Azərbaycan Respublikasının təkliflərini qəbul edir və protokollar imzalamağa razıdırlar.