Azərbaycan, Gəncə / Trend müxbir V.Məmmədov/ Gəncə şəhər Gigiyena və Epidemiologiya Mərkəzi şəhərin çörəkbişirmə sexlərində növbəti reydlərə başlayıb. Bu barədə çərşənbə günü Mərkəzin Qidalanmanını Gigiyenası bölməsinin müdiri Kamil Hüseynov məlumat verib.
Onun sözlərinə görə, reydin keçirilməsində məqsəd çörək bişirlən sexlərdə sanitar qaydalara riayət olunub-olunmamasını yoxlamaqdır. Hüseynov bildirib ki, şəhərin bir neçə çörəkbişirmə sexində olublar və onlardan üçünə ciddi xəbərdarlıq olunub. 10 işçi və müəssisə rəhbərləri ayrılıqda 22-55 manat civarında cərimə ediliblər. "Sexlərin əksəriyyətində gigiyenik qaydalara əməl olunmur. Sanitar qovşaqlar bərbad vəziyyətdədir, axar su olmadığına görə, işçilər sanitar qaydalara əməl edə bilmirlər" - deyə Hüseynov əlavə edib.
Yay mövsümündə çörəkbişirmə sexlərində və digər ərzaq satılan ticarət obyektlərində mütəmadi reydlər keçiriləcək.
Gəncə paytaxt Bakıdan 365 kilometr qərbdə yerləşir. Əhalisinin sayına görə, Azərbaycanın ikinci ən böyük şəhəridir.