Azərbaycan Milli Bankı valyuta ehtiyatlarının idarə olunması üçün əlavə xarici menecerlər seçir
Azərbaycan, Bakı/ Trend müxbir İ.Xəlilova/ Azərbaycan Milli Bankı (AMB) sərəncamında olan rəsmi valyuta ehtiyatlarının idarə olunması üçün xarici menecerlərin siyahısının genişləndirilməsi imkanlarını nəzərdən keçirir. Bunu cümə günü Milli Bankın idarə heyətinin sədri Elman Rüstəmov bildirib.
"Mən hesab edirəm ki, xarici idarəetməyə daha 200 mln. dollar vermək olar və ümumilikdə bu portfeli 0,5 mlrd. dollara çatdırmaq daha real olardı. Bununla yanaşı menecerlərin sayının da beşə çatdırılması effektiv olardı",-deyə Rüstəmov bildirib.
Onun sözlərinə görə, AMB-yə xarici şirkətlərdən xeyli müraciətlər daxil olur ki, bunların da arasında seçim aparılır.
Bu gün üç menecerin - Dünya Bankının Xəzinədarlığı, İsveçrənin UBS bankı və JP Morgan (Amerika) idarəçiliyində 270 mln. dollar vəsait var. "Vəsaitlərin qeyri-effektiv idarə olunması ilə əlaqədar olaraq Milli Bank Hollandiyanın ABN Amro bankı ilə olan müqaviləni ləğv edərək, həmin vəsaitləri UBS-in sərəncamına verib",-deyə Rüstəmov bildirib.
DB-nin sərəncamında 110 mln. dollar, UBS-də 55 mln. dollar, JP Morgan-da 55 mln dollar vəsait var. Xarici idarəçilikdə olan vəsaitlər Milli Bankın sərəncamındakı 2,2 mlrd. dollar ehtiyatın 12 faizini təşkil edir. AMB rəhbəri bu maliyyə institutları ilə əməkdaşlığı effektiv qiymətləndirib.
