Azərbaycan, Bakı /müx. Trend İ.Xəlilova / Maliyyə Nazirliyi "Azərbaycan Beynəlxalq Bankı" (ABB) ASC-nin nizamnamə kapitalında dövlət payının ödənilməsi məqsədilə 2007-ci ilin dövlət büdcəsində 15 mln. manat vəsait nəzərdə tutub. Bu barədə bankın İdarə Heyətinin sədri Cahangir Hacıyev məlumat verib. Onun sözlərinə görə, yaxın günlərdə bu vəsaitlər ödəniləcək.
ABB-nin nizamnamə kapitalının artırılması 60 mln. manat dəyərində olan səhmlərin emissiyası çərçivəsində aparılır. Bu səhmlərin yerləşdirilməsi 2006-cı il dekabrın 18-də başlayıb. Onun tam ödənməsi nəticəsində ABB-nin nizamnamə kapitalı 100 mln. manata çatdırılacaq. Səhmin nominal dəyəri 0,20 manatdır.
ABB-nin nizamnamə kapitalında dövlət payı 50,2 faiz təşkil edir. Digər hissə isə özəl hüquqi və fiziki şəxslər arasında bölünüb. Prezidentin 2005-ci il martın 1-də verdiyi sərəncama əsasən, dövlətin bankdakı payının satışı hissələrlə həyata keçirilə bilər. Müvafiq olaraq qiymət oların hər birinin satışı zamanı bankın fəaliyyətinin auditi hesabına müəyyənləşdiriləcək.
Hacıyevin sözlərinə görə, hazırda ABB-nin özəlləşdirilməsi ilə bağlı dövlət komissiyası onun dövlət nəzarətindən çıxarılması prosesinin müvafiq kriteriyalarını hazırlayır.
Bu proses "Kapital Bank"ın dövlət nəzarətindən çıxarılmasından sonra başlaya bilər, çünki onun özəlləşdirilməsinə artıq start verilib.