Azərbaycan, Bakı/ Trend , müxbir İ.Xəlilova/ Ölkədə fəaliyyət göstərən 43 bankın ümumi kapitalının həcmi 2007-ci ilin əvvəli (yanvarın 1-nə 603,3 mln. manat) ilə müqayisədə 39,5 faiz artaraq iyulun 1-nə 841,7 mln. manat təşkil edib. Bu barədə məlumatı Milli Bankdan veriblər. Ölkədə 44 bank mövcuddur, "Poctbank" isə fəaliyyəti tamamilə məhdudlaşdırıldığından hesabat aparmır.
İyulun 1-i üçün 31 bankın kapitalı 10 mln. manatı ötüb. Ümumi bank kapitalında onların xüsusi çəkisi 88,4 faiz təşkil edir. Xüsusi çəkisi 10,5 faiz olan 110 bankın kapitalı isə 5 mln. manatdan 10 mln. manata qədər həddə çatıb.
İyun ayında bankların kapitallaşmasında dəyişiklik baş verib. Belə ki, 7 bank kapitalı 10 mln. manatdan yuxarı olan baklar sırasına daxil olub.
AMB-nin normativ tələblərinə əsasən, 2007-ci il yanvar ayının 1-nə bankların nizamnamə kapitalı 8,2 mln. manat həcmində, iyul ayının 1-nə isə 10 mln. manat məbləğində olmalı idi.
Bununla belə, hələ də Azərbaycanda fəaliyyət göstərən iki bankın kapitalı 3,5 mln. manatdan 5 mln. manata qədərdir. AMB-nin Kredit təşkilatlarının fəaliyyətinə nəzarət departamentinin direktoru Adışirin Qasımov bildirib ki, avqustun sonuna qədər AMB ölkənin bank sahəsində kapitallaşmanın səviyyəsini qiymətləndirməni başa çatdıracaq. "Tələblərə cavab verməyən bankların əmanətlərin cəlb olunması üzrə lisenziyası dayandırılacaq, bununla da onlar avtomatik olaraq Sığorta Fondunun üzvü ola bilməyəcəklər. Onlar ya güclənməlidirlər, ya da öz statuslarını dəyişərək bank olmayan kredit təşkilatları kimi fəaliyyət göstərməlidirlər" - deyə Qasımov söyləyib.