Azərbaycan, Bakı, 22 fevral/ Trend , müxbir S.Əliyev/ Azərbaycan neftinin nəqlinin 2006-cı ilin oktyabrında dayandırıldığı Bakı - Supsa neft kəmərində təmir başa çatmaq üzrədir. Lakin boru kəmərinin dəqiq işə salınacağı tarix hələ məlum deyil. Bu barədə cümə günü BP Azerbaijan şirkətindən məlumat veriblər.
Boru kəmərinin təmiri başa çatdıqdan sonra onunla yenidən kəmərin operatoru olan Azərbaycan Beynəlxalq Əməliyyat Şirkətinin (ABƏŞ) nefti nəql olunacaq.
ABƏŞ Bakı - Supsa boru kəmərinin Gürcüstanın Zestafoni rayonundan keçən hissəsində torpağın hərəkəti monitorinqini aparıb. Kiçik tərpəniş qeydə alınıb və bu, 1000 metr uzunluğunda və təxminən $6 mln. dəyərində dolayı hissəsinin tikilməsinə gətirib.
Gürücüstan ərazisində Bakı - Supsa neft kəmərinin dolayı hissəsini Almaniyanın MLG şirkəti tikir.
İşlər dayandırılanadək Bakı - Supsa boru kəməri ilə ABƏŞ tərəfindən "Azəri-Çıraq-Günəşli" yataqları blokundan hasil edilən yüngül neft nəql edilib.
Azərbaycanın neft-qaz sahəsindəki mənbələrin məlumatına görə, boru kəmərinin apreldə istismara verilməsi nəzərdə tutulub.
