Azərbaycan, Bakı, 22 aprel/ Trend , müxbir S.Ağayeva/ Moldova energetika sektorunda Azərbaycanla əməkdaşlıq etməyi planlaşdırır. Bu mövzuda danışıqlar çərşənbə günü Bakıda, yüksək səviyyədə - Moldova prezidenti Vladimir Voroninin Azərbaycana rəsmi səfəri zamanı keçiriləcək. Bu barədə çərşənbə axşamı Moldovanın Azərbaycandakı səfiri İon Robu məlumat verib.
Azərbaycan və Moldova prezidentləri İlham Əliyev və Vladimir Voronin belə əməkdaşlığın qurulması imkanlarını nəzərdən keçirəcəklər. Təfərrüatlar danışıqlardan sonra məlum olacaq. Səfir bildirib ki, Moldova prezidenti Azərbaycan Dövlət Neft Şirkətinin (ARDNŞ) prezidenti Rövnəq Abdullayevlə ayrıca görüş keçirəcək.
Danışıqların yekunu üzrə yanacaq-energetika kompleksi sahəsində əməkdaşlıq haqqında hökumətlərarası saziş və Molodva hökuməti ilə ARDNŞ arasında memorandumun imzalanması gözlənilir.
Energetik əməkdaşlıq hər iki ölkənin daxil olduğu "Demokratiya və iqtisadi inkişaf uğrunda təşkilat- GUAM"a üzv ölkələrin qarşılıqlı münasibətlərinin vacib komponentlərindən biridir. Bu istiqamətdə ciddi irəliləyişə mayın 21-22-də Kiyevdə keçiriləcək energetika konfransında nail olmaq planlaşdırılır. Bu, Polşa prezidenti Lex Kaçinskinin təşəbbüsü ilə 2006-cı ildə təşkil edilən və 2007-ci ildə Litva prezidenti Valdas Adamkusun təşəbbüsü ilə Vilnüsdə davam etdirilən Krakov sammitinin davamı olacaq.