Azərbaycan, Bakı, 05 iyun/ Trend , müxbir E.İsmayılov/ Azərbaycanın Dövlət Neft Şirkəti (ARDNŞ) hesab edir ki, Azərbaycanda əlavə ixrac qaz kəməri tikmək lazımdır. Belə ki, mövcud Cənubi Qafqaz boru kəmərinin (SCP) gücü bütün planlaşdırılan yanacaq həcminin ixracı üçün kifayət etməyəcək.
ARDNŞ -nin geologiya, geofizika və yataqların işlənilməsi üzrə birinci vitse-prezidenti Xoşbəxt Yusifzadə ikinci qaz kəmərinin tikintisi fikrini "perspekitvli" adlandırıb.
"Xəzərdə qaz ehtiyatları neft ehtiyatlarından çoxdur. "Bir [ixrac] qaz kəməri [Azərbaycanda] kifayət etməyəcək", - Yusifzadə cümə axşamı jurnalistlərə bildirib.
Hazırda SCP qaz kəməri ilə "Şahdəniz" yatağından hasil edilən qaz Gürcüstan və Türkiyəyə ixrac olunur.
Əlavə qaz kəmərlərinin tikintisi barədə planlardan danışan birinci vitse-prezident neft ixracı ilə bağlı analogiya apararaq, bildirib ki, Azərbaycanda bir neçə neft kəmərinə obyektiv zərurət var.
"Bakı-Supsa neft kəməri artıq ikinci ildir ki işləmir. Bakı-Tbilisi-Ceyhan olmasaydı, biz nə edərdik?" - Yusifzadə sual verib.
Bakı-Supsa (gücü ildə 7 mln. ton neft) və Bakı-Tbilisi-Ceyhan (gücü ildə 50 mln. ton) neft kəmərlərinin operatoru BP şirkətidir. Boru kəmərləri ilə "Azəri-Çıraq-Günəşli" yataq blokundan hasil edilən yüngül neft ixrac olunur. Bakı-Supsa texniki səbəblərə görə 2006-cı ildən işləmir. Lakin yayın sonunadək bu kəmərlə ixrac bərpa olunacaq. Boru kəmərinin təmiri üzrə texniki işlər artıq başa çatdırılıb, sınaq və Bakı-Supsanın qismən neftlə doldurulması aparılır.
Müəlliflə əlaqə saxlamaq üçün elektron ünvan: [email protected]
