Azərbaycan, Bakı, 19 iyul/ Trend / Bakıda iyulun 21-25-də ABŞ-ın Beynəlxalq İnkişaf Agentliyinin (USAID), Kommunal xidmətlərin nizamlanması üzrə komissiya üzvləri milli assosiasiyasının (NARUC) və Enerji Tənzimləyiciləri Regional Assosiasiyasının (ERRA) maliyyə dəstəyi ilə Tarif Şurasının işçiləri və enerji sektoru strukturunun nümayəndələri üçün seminar keçiriləcək, - ABŞ-ın Azərbaycandakı səfirliyinin yaydığı məlumatda bildirilir. Seminar iqtisadi nizamlanma, tarif metodologiyası, qiymətlərin müəyyənləşdirilməsi prinsipləri, xidmətlərin keyfiyyəti və şəxsi yatırımların təşkilinə həsr ediləcək.
Seminarda məruzə ilə USAID-in baş iqtisadçısı Pol Devis və Azərbaycanın Tarif Şurası katibliyinin başçısı Elşən Əsədov çıxış edəcəklər.
Seminarın əsas məqsədi - enerji sektorunda əsas anlayışların izahı, qiymət strukturları və qiymətləndirmənin məqsəd və üsullarının tərtib edilməsindən ibarətdir.
İctimai xidmətlərin nizamlanması layihəsi USAID və NARUC tərəfindən birgə müzakirələrin, seminar və texniki təlimlərin köməyilə enerji tənzimlənməsinə təkan vermək üçün təşkil edilib.
Seminarda Tarif Şurası, İqtisadi İnkişaf Nazirliyi, Sənaye və Energetika Nazirliyi, Azərbaycanın dövlət mülikiyyətinin nizamlanması üzrə Dövlət Komissiyası, yerli kommunal xidmətlər, istehlakçılar və vətəndaş cəmiyyətinin nümayəndələri iştirak edəcəklər.