Azərbaycan, Bakı, 23 iyul/ Trend , müxbir S.Əliyev/ Cari ilin ilk altı ayı ərzində Azərbaycan Dövlət Neft Şirkətinin SOCAR Georgia şirkəti Gürcüstan bazarına təqribən 180 min ton müxtəlif neft məhsulu tədarük edib. Ötən il ərzində Gürcüstana cəmi 200 min ton neft məhsulu tədarük edilib. Bu barədə SOCAR Georgia şirkətinin rəhbəri Mahir Məmmədov məlumat verib.
Bu il Azərbaycan Dövlət Neft Şirkəti Gürcüstana hər ay 30 -35 min ton neft məhsulu tədarük edir. Onların sırasına avtomobil benzini, dizel yanacağı, aviasiya kerosini, mazut və bitum daxildir.
SOCAR Georgia Tbilisidə neft məhsullarının saxlanılması üçün iri bazanın tikintisini də həyata keçirir. Neft bazasının tikinti layihəsinin dəyəri $15 mln. qiymətləndirilir. Şirkət bu bazanı gələn ilin sonunadək tikmək niyyətindədir.
Neftbaza Tbilisi Beynəlxalq Hava Limanı yaxınlığında Kiziki küçəsində tikiləcək. Şirkət tikintinin həyata keçirilməsi üçün ötən il təqribən $3 mln.-a beş ha torpaq sahəsi alıb. Yeni obyektin çənləri 20 min tonadək neft məhsulları, o cümlədən Gürcüstan bazarında realizə olunacaq mayeləşdirilmiş qaz saxlamağa imkan verir.
Bu bazada müxtəlif növ benzin, kerosin, bitum, mayeləşdirilmiş qaz və mazut saxlanılacaq. Bazanın sahəsi təqribən 5 ha təşkil edəcək.
Müəlliflə əlaqə saxlamaq üçün elektron ünvan: [email protected]