Azərbaycan, Bakı, 25 avqust/ Trend , müxbir E.İsmayılov, S.İlhamqızı/ Avqustun əvvəlində zədələnmiş Bakı-Tbilisi-Ceyhan (BTC) neft kəmərinin təmirindən sonra çərşənbə axşamı Ceyhan limanından Azərbaycan nefti ilə yüklənmiş birinci tanker göndəriləcək, Botas International Limited şirkətinin KİV ilə iş üzrə şöbəsinin rəhbəri Hüseyn Sağır bazar ertəsi telefonla Trend -a bildirib. Boru kəməri ilə neftin nəqli davam edir, neft Ceyhandakı çənlərə doldurulur.
"Birinci tankeri sabah yükləyəcəyik, hazırda Azərbaycan neft çənlərə doldurulur", - Sağır bildirib.
BP Azerbaijan şirkətindən bildiriblər ki, Azeri Light markalı neftin hasilat və ixracı tədricən sabitləşir.
"Biz "Azəri - Çıraq - Günəşli" yataqlarından neft hasilatını və Bakı-Tbilisi-Ceyhan boru kəməri ilə xammal ixracını tədricən artırırıq", - bazar ertəsi şirkətdən bildiriblər. BP şirkəti BTC ilə neft ixracını sutkada 800 mindən çox barelə çatdırmağı planlaşdırır. BTC-nin Türkiyə hissəsində baş verən partlayışadək kəmərlə bu həcmdə neft nəql edilib.
Regional neft daşınmaları bazarındakı mənbənin bildirdiyinə görə, hazırda BTC boru kəməri ilə neft nəqli sutkada 600 min barelə bərabərdir. Boru kəmərinə neft Səngəçal terminalındakı çənlərdən vurulur.
Avqustun 5-də axşam saatlarında Bakı-Tbilisi-Ceyhan neft kəmərinin Türkiyənin Ərzincan vilayətindən keçən hissəsində partlayış baş verib və nəticədə 30 saylı nasosda yanğın başlayıb. Yanğın avqustun 11-də söndürülüb.
BTC neft kəmərinin ümumi uzunluğu 1768 kilometrdir. Bunun 443 km Azərabaycan, 249 km Gürcüstan, 1076 km Türkiyə ərazisindən keçir. Boru kəmərinin tikintisi 2003-cü ildə, onun neftlə doldurulması isə 2005-ci il mayın 18-də başlayıb.
BTC-nin tikintisi $4 mlrd. başa gəlib. Bu, tikinti işləri, boru kəmərinin doldurulmasına çəkilən xərclərdir. Maliyyə xərcləri və bank faizlərinin ödənilməsi bura daxil deyil. Ümumi maliyyə kreditinin məbləği $2,6 mlrd. təşkil edir.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz ); Statoil (8,71 faiz ); TRAO (6,53 faiz ); Eni (5 faiz ); Total (5 faiz ); Itochu (3,40 faiz ); Inpex (2,50 faiz ); ConocoPhillips (2,50 faiz ) və Amerada Hess (2,36 faiz ).
Müəlliflə əlaqə saxlamaq üçün elektron ünvan: [email protected]
