Azərbaycan, Bakı, 10 oktyabr/ Trend , müxbirlər E.İsmayılov, S.Əliyev/ BP şirkəti oktyabrın ikinci yarısından Bakı - Tbilisi - Ceyhan (BTC) boru kəməri ilə Chevron şirkətinin Qazaxıstanın "Tengiz" yatağından hasil etdiyi neftin nəqlinin başlayacağını gözləyir, - BP - Azerbaijan şirkətindən cümə günü bildiriblər.
Şirkətdən Chevron-un nəql ediləcək neftinin həcmini dəqiqləşdirməsələr də, qeyd ediblər ki, birinci mərhələdə bu həcm o qədər də çox olmayacaq.
"Tengizşevroyl" (TŞO) şirkətinin hökumət və icitmaiyyətlə əlaqələr şöbəsinin Baş menecerinin müavini Linsi Kraynın (Linsi Crain) elektron poçtla bildirdiyinə görə, TŞO öz neftini Novorossiysk limanından ixrac edilməsi üçün Xəzər Boru kəməri Konsorsiumunun (XBK) boru kəməri ilə nəql edib. Xammalın qalan hissəsi dəmir yolu ilə Odessaya göndərilib.
"Tengizşevroyl" neftin hasilatının artması ilə əlaqədar bəzi ixrac marşrutlarını genişlənidirib. "Buraya, dəmir yolu da daxil olmaqla, şimal marşrutları, Xəzərlə gəmilər, dəmir yolu ilə və boru kəmərləri vasitəsilə nəqletmə daxil olmaqla, cənub marşrutları daxildir", - Krayn bildirib.
Bununla yanaşı, o qeyd edib ki, TŞO müqavilələrin təfərrüatlarını, neftin həcmini, nəqletmənin həyat keçiriləcəyi liman və terminalları müzakirə etməyəcək.
Amerika şirkəti artıq Qazaxıstanda hasil edilən neftin Azərbaycan Xəzər Dəniz Gəmiçiliyinin tankerləri ilə daşınması haqqında müqavilə bağlayıb. Ekspertlərin əvvəllər bildirdiklərinə görə, şirkət Azərbaycan ərazisindən ümumilikdə təxminən 5 mln. ton neft nəql etmək niyyətindədir. Xammalın bir hissəsi Qazaxıstanın tankerləri ilə daşınacaq.
Chevron Qazaxıstanın "Tengiz" yatağında hasilatın operatorudur. "Tengiz"dən hasil edilən neft BTC Co şirkətinin idarəsində olan Bakı - Tbilisi - Ceyhan boru kəməri ilə, həmçinin, dəmir yolu ilə Gürcüstanın Kulevi və Batumi limanlarına nəql ediləcək. Neftin bu marşrutlarla nəqli haqqında müqavilələr artıq imzalanıb.
Chevron quruda yerləşən "Tengiz" yatağından nefti dəmir yolu ilə Qazaxıstanın Xəzərdəki Aktau limanınadək nnəql edəcək, buradan isə, xammal tankerlərlə Bakıyadək çatdırılacaq. Bakı limanından neft BTC boru kəmərinin girişinin yerləşdiyi Səngəçal terminalına (operatoru BP) çatdırılacaq.
Neft Gürcüstanın limanlarınadək dəmir yolu nəqliyyatı ilə çatdırılacaq. Gürcüstanın Kulevidəki Qara dəniz terminalı Azərbaycanın Dövlət Neft Şirkətinə, Batumi terminalı isə, Qazaxıstana məxsusdur.
Müəlliflə əlaqə saxlamaq üçün elektron ünvan: [email protected]
