Azərbaycan, Bakı, 14 yanvar/ Trend , müxbir E.İsmayılov/ SOCAR şirkəti (Azərbaycan Dövlt Neft Şirkəti) apreldə "Ümid" perspektivli qazkondensat dəniz strukturunda kəşfiyyat qazma işlərinə başlamağı planlaşdırır. Bu barədə SOCAR-da işlərə yaxın mənbədən bildiriblər. Əvvəllər qazma işlərinin martda başlanması nəzərdə tutulurdu.
" "Ümid"də kəşfiyyat quyusunun qazılması Çin istehsalı olan yeni ZJ70/4500DZ qazma avadanlığından istifadə ilə həyata keçiriləcək", - deyə quyuda qazma işlərini həyata keçirəcək "Kompleks qazma işləri" Trestinin rəhbəri İskəndər Şirəli əvvəllər bildirib.
Yeni avadanlığın köməkliyi ilə 7000-7500 metr dərinliyində quyu qazmaq olar. Yeni avadanlıq Trestə məxsusdur.
"Biz qazmaya apreldə başlamağı planlaşdırırıq, hər şey tikinti işlərinin gedişatından asılıdır", - deyə mənbə bildirib.
"Ümid- 1" dəniz platformasının istismarı SOCAR-a şəxsi vəsaitlər hesabına işlənən yataqlarda qaz hasilatının artırılması üzrə proqramın reallaşdırılması çərçivəsində lazımdır. Proqrama əsasən, SOCAR-ın dövlətə təhvil verməli olduğu təbii qaz həcmi 8 mlrd. kubmetr təşkil etməlidir. Bu il SOCAR 8 mlrd. kubmetr qaz hasil etməyi planlaşdırır ki, bunun da 7 mlrd.-ı dövlətə təhvil veriləcək.
Tikilməkdə olan "Çıraq-6" platformasının bazasında inşa edilən "Ümid-1" platforması proqram çərçivəsində ən iri obyektdir. Onun hündürlüyü 72 metr təşkil edir. Platforma suyun 58 metr dərinliyində "Bulla dəniz" dəniz yatağından 15 km. aralıda yerləşəcək.
SOCAR-dan əvvəllər verilən məlumata görə, platformada altı qaz quyusunun qazılması planlaşdırılır. Strukturda ilk kəşfiyyat quyusunun layihə dərinliyi 6500 metr təşkil edir.
"Ümid" dəniz strukturunda ümumi çıxarılması ehtimal olunan qaz ehtiyyatları SOCAR geoloqlarının qiymətləndirməsinə görə, 200-300 mlrd. kubmetr həcmində qiymətləndirilir.
Məqalə müəllifi ilə əlaqə ünvanı - [email protected]