Azərbaycan, Bakı, 04 fevral/ Trend , müxbir N.Abdullayeva/ Qazaxıstanın "KazMunayqaz" (KMQ) Milli Şirkəti 2009-cu ildə qazax neftinin Azərbaycan ərazisi vasitəsilə dünya bazarlarına nəqlini nəzərdə tutan Qazaxıstan Xəzər Nəqletmə Sistemi (QXNS) üzrə bütün zəruri layihə sazişlərinin imzalanmasına nail olmaq niyyətindədir, - Qazaxıstanın Azərbaycandakı səfiri Serik Primbetov bildirib.
Noyabrın ortalarında "KazMunayqaz" və SOCAR (Azərbaycan Dövlət Neft Şirkəti) Trans-Xəzər layihəsinin əsas realizə prinsipləri haqqında saziş imzalayıblar. Saziş, layihənin birgə realizəsinin əsas şərt və prinsiplərini müəyyən edir.
"Bu saziş layihənin birgə realizəsinin əsas şərt və prinsiplərini, SOCAR və "KazMunayQaz"ın birgə layihə şirkəti yaratmasını, maliyyələşdirmə, tariflərin təşkil edilməsi, yaradılan istehsal güclərinə çıxışın şərtləri və Trans-Xəzər sisteminin mərhələli inkişafını müəyyən edir", - deyə səfir qeyd edib.
"Mənim rəyimə görə, bu sənəd Qazaxıstan və Azərbaycanın ixrac neft marşrutlarının diversifikasiyası sahəsindəki milli maraqlarına tam uyğundur", - deyə Primbetov bildirib.
Güman olunur ki, Bakı - Tbilisi - Ceyhan boru kəməri ilə Qazaxıstan Respublikasnın iki ən iri yatağından - "Tengiz" və sonradan "Kaşağan" yatağından hasil olunan 25 milyon ton neft nəql ediləcək .
Qazaxıstan neftinin BTC ilə uğurlu nəqli üçün Kurık limanının genişləndirilməsi lazımdır. Qazaxıstan yataqlarından hasil edilən neft bu limandan Xəzərlə Bakı - Tbilisi - Ceyhan sisteminə çatdırılacaq.
Səfir əlavə edib ki, 2008-ci ilin oktyabr ayının sonunda "Tengiz" nefti ilə yüklənmiş ilk tankerlər Xəzər vasitəsilə Aktau limanından Bakı istiqamətində hərəkətə başlayıb. Noyabrın ilk günlərində isə "Tengiz" neftinin Aralıq dənizi və sonradan dünya bazarlarına çıxışla Bakı - Tbilisi - Ceyhan boru kəməri üzrə nəqli başlayıb.
2008-ci ildə Bakıya çatdırılmış "Tengiz" nefti həcmlərinin bir hissəsi neft kəmərindən başqa, dəmir yolu ilə Gürcüstana, Batumi Qara dəniz limanınadək göndərilib və 2008-ci il noyabrın ilk günlərindən neftin Qara dəniz vasitəsilə Batumidən dünya bazarları üçün yüklənməsi başlayıb.
Məqalə müəllifi ilə əlaqə ünvanı - [email protected]
