Azərbaycan, Bakı, 27 aprel / Trend , müxbir Ü.İsmayılova /
Azəriqaz-a "2009-13-cü illərdə regionların sosial-iqtisadi inkişafı" Dövlət Proqramının reallaşdırılması çərçivəsində qazlaşdırma səviyyəsinin hazırkı 85 faizdən 93 faizədək artırılması tapşırılıb. Bu barədə bazar ertəsi keçirilən mətbuat konfransında Azəriqaz QSC rəhbərinin müavini Nazim Səmədzadə bildirib.
"Dövlət Proqramının reallaşdırılması nəticəsində biz ölkədə qazlaşdırma səviyyəsini 8 faiz artırmalıyıq", - deyə Səmədzadə bildirib.
Onun sözlərinə görə, bunun üçün idarəyə təbii qazın satışı hesabına formalaşan vəsait lazımdır. "Lakin təşkilat yığım səviyyəsinin aşağı olması səbəbindən müəyyən çətinliklər hiss edir", - deyə Səmədzadə bildirib.
Onun sözlərinə görə, Azəriqaz-a bələdiyyə və yerli icra orqanları rəhbərləri tərəfindən yerli büdcə hesabına qazlaşdırmaya dair müraciətlər daxil olmağa başlayıb.
"Lakin Azəriqaz bəyan edir ki, qazdan istifadə haqlarının yığım səviyyəsi aşağı olan heç bir rayona və ya şəhərə qazlaşdırma həyata keçirməyə imkan verməyəək. Bu məsələ yalnız ödəmə ilə bağlı vəziyyətin təhlilindən sonra nəzərdən keçiriləcək, çünki belə olan halda Azəriqaz böyük vəsait itirir", - deyə Səmədzadə vurğulayıb.
Məqalə müəllifi ilə əlaqə ünvanı: [email protected]
