Azərbaycan, Bakı, 29 iyun / Trend , müxbir А.Bədəlova /
"Türkiyə "Nabukko" qaz layihəsinin realizəsinin sürətləndirilməsi məqsədilə, bu kəmər vasitəsilə onun ərazisindən nəql ediləcək Xəzər və Yaxın Şərq tranzit qazına olan tələblərini azaltmaq qərarına gəlib", - Energy Intelligence Group, neftqaz sahəsindəki mənbələrinə istinadən yazır.
Bir müddət əvvəl Türkiyə ölkədə sürətlə artan tələbatın ödənilməsi üçün, "Nabukko" ilə nəql edilən yanacağın ümumi həcmindən 15 faizini güzəştli qiymətlərlə almağı tələb edirdi.
Türkiyənin BOTAS dövlət boru kəməri şirkətinin məlumatına görə, 2010-cu ildə Türkiyədə qaza tələbat 43,806 milyard kubmetr təşkil edəcək ki, bu da 2009-cu ildəki 40,903 milyard kubmetrlik həcmdən 7 faiz çox olacaq. Türkiyənin əsas qaz tədarükçüləri Rusiya, Əlcəzair, Nigeriya və Azərbaycandır.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixrac etmək nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. Boru kəmərinin maksimal gücü ildə 31 mlrd. kubmetrə bərabərdir. Layihənin iştirakçıları OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir.
Hazırda layihə təfərrüatlı injinirinq mərhələsindədir. Onun realizəsinin növbəti mərhələsi iyulda hökumətlərarası müqavilənin imzalanması olacaq. Aİ və Türkiyə arasında bağlanacaq müqavilənin imzalanma yeri olaraq Ankara seçilib.
RWE-nin "Nabukko" üzrə siyasi əlaqələr və strategiyalar rəhbəri Neyl Makmillanın sözlərinə görə, hökumətlərarası müqavilə "Nabukko"nun əsas qaz tədarükçüləri olan Azərbaycan və Türkmənistanın layihənin tikintisinin ilk iki mərhələsində bu kəmərlə qaz tədarük edəcəklərinə təminat olub.
Hökumətlərarası müqavilənin imzalanmasından sonrakı addım "open season" prosesi - boru kəmərinin doldurulması üçün sifarişlərin qəbulu olacaq. Bundan sonra, 2010-cu ilin birinci rübündə layihə üzrə yekun sərmayə qərarı qəbul ediləcək.
Məqalə müəllifi ilə əlaqə ünvanı: [email protected]