Azərbaycan, Bakı, 02 iyul / Trend , müxbir E.İsmayılov /
"Xəzərin Azərbaycan sektorunun "Ümid" perspektiv qaz strukturunda birinci kəşfiyyat quyusunun qazılmasına iyulun ikinci yarısında start verilə bilər", - cümə axşamı bu strukturu müstəqil şəkildə işlətməyi planlaşdıran SOCAR-dakı mənbə məlumat verib.
"Qazma işinə hazırlığın 85 faizi başa çatıb, qalan iş isə kiçik tamamlama işləridir. Platformada bu iş üçün lazım olan bütün avadanlılqlar quraşdırılıb, yalnız kiçik həcmdə işlər qalıb", - mənbə deyib.
Mənbənin sözlərinə görə, bu strukturda qazma işi ilk dəfə aparıldığından, burada güclü təzyiq gözlənilir və buna görə də qazma işlərinə hazırlıq dəqiqliklə aparılır.
Qazma işini SOCAR-ın tərkibinə daxil olan "Bayıl Limanı" dəniz kəşfiyyat-qazıma idarəsi aparacaq.
Bu strukturdakı birinci quyunun dərinliyi 6,5 min metr olacaq. Onun dörd min metrinin bu il qazılması gözlənilir. Qazma işlərinin gələn il başa çatdırılacağı gözlənilir.
Tikintisi başa çatdırılmamış "Çıraq-6" platformasının bazasında yerləşən "Ümid-1" platforması SOCAR-ın qaz proqramı çərçivəsində ən böyük obyektdir. Onun hündürlüyü 72 metr olacaq. Platforma "Bulla-dəniz" yatağının 15 kilometr yaxınlığında, 58 metr dərinlikdə yerləşəcək. Platformadan altı quyunun qazılması planlaşdırılır.
"Ümid"in gözlənilən qaz ehtiyatları 300 milyard kubmetr, qaz kondensatı isə 30-40 milyon tondur.
Məqalə müəllifi ilə əlaqə ünvanı: [email protected]
