Azərbaycan, Bakı, 04 iyul / Trend , müxbir E.İsmayılov /
SOCAR-ın Türkiyə tərəfi ilə danışıqlarda əsas məqsədi Azərbaycanın "Şahdəniz" dəniz qaz-kondensat yatağının işlənməsi çərçivəsində qaz qiymətlərinin neftin dəyişkən qiymətləri ilə əlaqəli olan formula uyğun müəyyən edilməsidir. Bu barədə SOCAR-ın yüksək vəzifəli nümayəndəsi bildirib.
"Biz konkret rəqəm barədə danışmaq istəmirik, sadəcə neft qiymətlərindəki dəyişiklik qaza da tətbiq edilməlidir", - SOCAR nümayəndəsi deyib.
Onun sözlərinə əsasən. şirkət öz istəklərini təkcə hazırda mövcud olan şərait baxımından bəyan etmir. Şirkətin əsas məqsədi Azərbaycan qazının qiymətlərinin Türkiyə bazarına daxil olan digər mənbələrin qiymətlərinə uyğun müəyyən edilməsidir. "Biz bütün qaydalar üzrə hərəkət etmək istəyirik", - deyə o, əlavə edib.
Son zamanlar enerji təhlükəsizliyində qaz faktorunun rolu əhəmiyyətli dərəcədə artıb. "Qaz ikinci dərəcəli məhsuldan əsas məhsula çevirlib və buna görə də onun qiymətlərinin dəyişilməsi normal dinamik prosesdir", - SOCAR nümayəndəsi bildirib.
Yaxın zamanlarda SOCAR vəTürkiyə tərəfi ilə qaz qiymətləri üzrə danışıqların növbəti raundunun keçirilməsi gözlənilir.
Hazırda Azərbaycan Türkiyə üçün qaz qiymətlərini "Şahdəniz" layihəsinin işlənməsinin birinci mərhələsində artırmaq niyyətindədir. Hazırda Azərbaycandan qaz Türkiyəyə 100 kubmetr üçün 120 dollar qiyməti ilə tədarük olunur. Bu qiymət 2001-ci ildə imzalanmış müqavilədə qeyd olunub.
Türkiyə ilə imzlanan müqavilədə qeyd olunduğu kimi "Şahdəniz" yatağından hasil edilən qazın qiymətlərinə tədarükün başlanmasından sonrakı il ərzində yenidən baxıla bilər. Bu o deməkdir ki, yeni qiymət 2008-ci ilin aprel ayının 15-dən müəyyən edilə bilər.
Müqaviləyə əsasən, Türkiyə "Şahdəniz" yatağından bu layihənin birinci mərhələsinin işlənməsi çərçivəsində 6,6 milyard kubmetr qaz əldə etməlidir. Layihə üzrə tədarükün qeyd olunan həcmi artıq bu il həyata keçiriləcək.
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Layihə iştirakçıları bunlardır: BP (operator) -25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, SOCAR - 10 faiz. Bu yataqda ümumi qaz ehtiyatı 1,2 trln. kubmetr həcmində qiymətləndirilir.
Məqalə müəllifi ilə əlaqə ünvanı: [email protected]