Azərbaycan, Bakı, 24 avqust / Trend , müxbir E.İsmayılov /
"Gürcüstanda SOCAR Georgia Gas şirkətinin (SOCAR Energy Georgia-nın törəmə müəssisəsi) istifadəsində olan 31 qaz təsərrüfatının infrastrukturunun qazlaşdırılması və bərpası üzrə üç illik layihənin birinci ilinə lazım olan sərmayənin həcmi 48 milyon laridir (təxminən 28,6 milyon dollar)", - bazar ertəsi SOCAR Georgia Gas-dan deyilib. SOCAR Energy Georgia ARDNŞ-nin (Azərbaycan Respublikası Dövlət Neft Şirkəti) törəmə şirkətidir.
"Bu vəsaitlər hesabına 57 min yeni potensial istehlakçı üçün 800 kilometrə yaxın ümumi uzunluğa malik qazpaylayıcı şəbəkə tikiləcək", - mənbədən bildirilib.
"Qaz təsərrüfatı infrastrukturunun qazlaşdırılması və bərpası çərçivəsində layihələndirmə başa çatıb və genişmiqyaslı tikinti-montaj işləri başlayıb", - mənbədən deyilib.
Bir müddət əvvəl SOCAR Energy Georgia-dakı mənbədən bildirilib ki, bu layihə üçün üç ildə nəzərdə tutulan sərmayənin həcmi ilkin 40 milyon dollardan 70-80 milyon dollara qədər arta bilər. "İlkin mərhələdə bu layihə çərçivəsində nəzərdə tutulan minimal məbləğ 40 milyon dollar təşkil edirdi. Bu minimal limit idi. Paylaşdırıcı şəbəkələrin bərpası nəzərə alınmaqla, qazlaşdırma işinə məxaricin həcmi təxminən 70-80 milyon dollar təşkil edə bilər", - mənbədən deyilib. Hazırda qazlaşdırma prosesi davam edir və artıq sentyabrda bir çox kəndlərə qaz verilişini başlamaq planlaşdırılır.
Mənbədən bir müddət əvvəl deyilənə görə, hazırda SOCAR Georgia Gas-ın istismarında olan qazpaylayıcı şəbəkələrin tələbatı ildə təxminən 80-90 milyon kubmetrdir. Bu il ərzində şirkət bu şəbəkələrin abunəçilərinin sayını 56 mindən 60 minə qədər artırmaq istəyir. Birinci mərhələdə daha 15 min abunəçi şəbəkələrə qoşulacaq. Üç il ərzində şirkət abunəçilərinin sayını 150 minə qədər artırmağı planlaşdırır.
Dekabrın 26-da ARDNŞ və Gürcüstan hökuməti 30 qazpaylayıcı təsərrüfat və qazpaylayıcı şəbəkənin istifadəyə ötürülməsi haqqında müqavilə imzalayıb. Bu şəbəkələr Gürcüstanın Kaxeti, Msxeta-Mtianeti, Şida və Kvemo-Kartli, Acarıstan, Quriya, İmereti, Sameqrelo kimi regionlarını əhatə edir. Bu şəbəkələr 24 şirkət tərəfindən istismar edilib.
Apreldə SOCAR Energy Georgia, həmçinin Gürcüstanın azərbaycanlıların kontakt yaşadığı Marneuli rayonunun qazpaylayıcı şəbəkəsini də istifadəyə alıb. Bu daha 31 qaz təsərrüfatı deməkdir.
Əvvəllər bu şəbəkənin sahibi "Wissol" şirkəti olub. Bu şirkət qazı ARDNŞ-dən alaraq Marneuli ərazisində satışı ilə məşğul olub. İndi bu istiqamətdə bütün işləri SOCAR Energy Georgia həyata keçirəcək. Bu paylayıcı şəbəkənin alınması, onların inkişafı və idarə edilməsi 40 milyon dollarlıq sərmayə proqramına daxil edilməyib.
Məqalə müəllifi ilə əlaqə ünvanı: [email protected]
